Diamars 12 di December proximo lo tin eleccion pa yena un vacatura pa ‘Kleinbedrijf’ den directiva di Camara di Comercio y Industria.
Sandy Odor, actualmente funcionando como Regulatory Compliance Manager den area di Integridad na un banco local, sigur kier tuma e responsabilidad aki pa por mehora e sistema den comercio.
“E ley actual ta limitando hopi startups y empresarionan existente, y esaki sigur lo por wordo ahustá.” Sandy ta splica.
Sandy ta pensa cu pa startups, e sistema actual su costonan ta hopi halto y e proceso pa logra esaki ta un caminda di cruz. Su plan pa esaki ta pa restora esaki bou di un instancia ‘one stop shop’, unda cu full e proceso aki ta wordo encamina cu ta haci’e uno mas accesibel pa un y tur y tambe e parti mas importante lo ta pa costa menos posibel ‘cost friendly’.
Negoshinan existente ta lucha contra competencia y na esaki hopi por wordo haci. Por ehempel, adapta y ancra e “ROP” den ley, cual lo structura e maneho y asina por ehempel negoshinan mag di bin establece den areanan cu ta permisibel door di e ley aki y of negoshinan existente mester tene tambe na cuenta ora di diferencia nan producto/servicio pa asina un no stroba e otro.
Tambe kier amplia e regimen fiscal existente na San Nicolaas pa otro areanan manera Caya Grandi of areanan unda tin necesidad pa crecemento di comercio. Of usando concepto/regimen similar na unda cu pa por ehempel duna como comerciante bo ta haya di un ‘ondernemingsaftrek’ ariba bo entradanan pa asina como comerciante bo por inverti den bo compania pero tambe den bo empleadonan y asina eleva e servicio y producto pa e consumidor.
“Esaki ainda ta un splikashon kortiko, tin full un lista di solushon pa nos comerciantenan” Sandy Odor bisando ya cu e tin full su concepto prepara pa por ehecuta esaki y pesey ta invita tur comerciante di un ‘Kleinbedrijf’ pa bin vota diamars awo, dia 12 di December na Camara di Comercia entre 9:00am te cu 12:00pm.