Den cuadro di Luna di Monumento, y den tema di ICOM 2016 ‘Cultural Landscapes’, Museo Arqueologico, den colaboracion cu Fundacion di Monumento y Fundacion Museo Arubano, ta organisa e aña aki otro Expedicion Arqueologico riba diadomingo dia 18 di September. Esaki ta e di tres biaha cu Museo Arqueologico ta ofrece gratis e actividad interesante aki pa public den Luna di Monumento, asina enfocando riba e importancia di conserva e monumentonan di mas bieu di nos isla, esta e sitionan arqueologico.
E biaha aki e expedicion lo cuminsa na e Watertoren na San Nicolas, unda e Museo di Industria lo ta habri pa publico. Dia 18 di September, for di 10’or di mainta, busnan lo sali pa sitionan arqueologico localisa na e area di San Nicolas, unda e expertonan den arqueologia lo duna e participantenan informacion di e sitionan specifico aki. Algun di e sitionan aki ta ubica den bunita areanan di naturalesa, pa cual lo mester cana algun pida den santo blanco pa yega na e e lugarnan un poco scondi aki. Alavez tin e opcion pa subi un poco riba baranca pa asina yega na un sitio di pintura riba baranca hopi bunita mes. Pues tene cuenta cu participantenan mester por cana bon y bisti bon sapato pa cana y subi riba baranca.
Tambe nos ta conseha tur participante pa usa un bon ‘sunblock’, bisti petchi y trece suficiente awa pa bebe y algo pa snack riba e trip aventuroso aki. Cupo riba bus ta limita, pues mester yama Museo Arqueologico, puntra pa Cristy Werleman y registra pa sigura participacion riba e bus. Nos ta tuma registracion cuminsando dialuna dia 12 di September. Mas cu claro tambe ta posibel pa bishita e sitionan e dia aki entre 10’or di mainta pa 1 ‘or di merdia cu propio transporte. Un y tur cu ta interesa por yama Museo Arqueologico na 582-8979 pa mas informacion y registracion.