Pa celebra un gran etapa manera Caribbean Sea Jazz Festival su di 10 aniversario nan ta trece un line-up unico cu tanto artistanan internacional como nos artistanan local.
Izaline Calister un gran artista di Curacao a construi un trayectoria impresionante den e ultimo 12 añanan. Cu su estilo encantador el a gana un grupo di fiel fanaticonan rond mundo. Izaline ta posee e don excepcional cu ta haci tur e diferencia pa ta un solista, ora e canta den su lenga materno, Papiamento, cu sentimento y gracia.
E tin e capacidad aki de permanece fiel na su rais y a logra alcansa y
conkista e publico di henter mundo, cantando den un idioma desconoci, mientras cu e ta trece su show na perfeccion. Izaline su musica ta un fusion entre e musica tradicional di su isla natal Corsou, cu influencia y jazz cu influencia Afro-Caribense.
E cancionnan, “Wow’I Karño, Kanta Hélele, Sa Sa Na Awasa” y su mas
Reciente cancion “ Reina Di Pordon” hunto cu Buleria tabata hitnan number 1 den Caribe. Su albumnan: “Soño di un Muhé, Mariposa, Krioyo, Kanta Hélele, Speransa y e album cu a lansa e aña aki Rayo di Luz a ser lansa rond mundo.
Cu su gran banda y su areglonan Izaline semper ta cautiva y trece un ambiente special pa su publico den cualkier ocasion. Y e lo haci esaki diasabra 24 di September na Renaissance Festival Plaza unda e lo presenta su Album nobo Rayo di Luz pa e pueblo di Aruba.
Mane tur aña no ta solamente artistanan internacional lo presenta durante Caribbean Sea Jazz Festival pero tambe nos gran artistanan local mane Carlos Bislip Caribbean Combo y e banda Fuente.
Caribbean Combo ta un ensemble/grupo estableci di Scol di Musica Rufo Wever bou di e liderasgo di Carlos Bislip. E concepto di e ensemble aki ta pa familiarisa e musiconan hoben cu e ritmonan di nos region “Caribe y Sur America como vehiculo pa alcansa nan meta. Caribbean Combo ta existi 5 aña caba, unda cu hopi musiconan hoben participante a bay scol y a haya nan training den nan “Performance Practices” of “E Practicanan di Presentacion” di tanto Jazz como e musica Caribense. Hopi di e musiconan hoben aki a sigui nan propio caminda y ta formando parti awor di gruponan musical den diferente genero manera Musica Tropical y tambe a presenta den varios Caribbean Sea Jazz Festival.
E edad di e participantenan aki ta varia entre 13 pa 20 aña. Bin apoya nos hobennan talentoso diasabra 24 di September na Renaissance Festival Plaza.
Fuente trio ta un extracto di e banda original Fuente, cu tabata consisti di 20 musico. E integrantenan di e trio aki ta Susjaira Kerpens (vocal y guitara) , Siegfried Hart ( caha y un poco di percusion) y Ivan Quandus (baho di 6 cuerde/ six string bass) cu ta toca un variedad di musica mixto cu e sabor di Jazz. Estilonan di Pop Latino, Caribense y musica local y Susjaira cu su bunita voz ta duna e musica su toke special.
Un biaha mas Caribbean Sea Jazz kier invita pueblo completo pa bin disfruta un ambiente unico cu Caribbean Sea Jazz festival so por trece dia 23 y 24 di September. Carchinan ta obtenibel pa solamente $55,-. na Super Food, Valero Boulevard & Essoville, Plaza Book Shop, The Market at Alhambra, Cafe the Plaza, Moomba Beach, Palm Tours, Red Sail Sports & Pelican Adventures.