Tur diamars tin un ambiente placentero na Museo Historico Aruba ora cu e caha di orgel ta
cuminsa toca indicando cu Bon Bini Festival ta den cuminsa. E bishitantenan ta cuminsa drenta y mientras nan ta warda nan por cana rond apreciando e diferente artesanianan local cu tin presente of saborea un dushi cuminda crioyo.
Bon Bini Festival a cuminsa na Hotel Central bou di e nomber di Watapana Festival y for di
1985 por disfruta di e show aki dentro di e murayanan di Fort Zoutman. Pa mas cu 30 aña caba e festival aki a sa di deleita tanto localnan como turistanan. E meta principal di Fundacion Museo Arubano, cu ta e entidad encarga cu Bon Bini Festival desde 2015, ta pa comparti y sigui promove nos folklore y tradicionnan.
Pa e motibo aki a renoba e show recientemente pa asina enrikece e experiencia di e bishitantenan mas ainda. Entrada pa e Bon Bini Festival nobo lo ta $10 y tambe tin prijs special pa local. E contribucion aki lo percura cu e fundacion lo por sigui mehora y brinda un show di calidad na un y tur. E portanan ta habri for di 6’or di atardi y e show lo cuminsa pa 7’or di anochi.
Fundacion Museo Arubano hunto cu Museo Historico Aruba ta invita henter pueblo pa pasa
diamars na Fort Zoutman pa disfruta di e festival nobo aki. Bin gosa di Bon Bini Festival y pasa un rato masha agradabel dentro di e monumento di mas bieu ariba nos isla.