Andin Bikker a bisa den rueda di prensa di Partido POR e Plataforma Forsa Nobo, relaciona cu e tema di maneho deficiente di minister di husticia y mirando cu posiblemente e lo wordo postula bek riba lista pa AVP, cu tarea di pueblo ta haci un diferencia dia 22 di September cu tin eleccion, caminda comunidad lo duna un sosten na e partidonan cu si ta bin cu un cambio, manera nan partido POR. Bikker a expresa: “Nos si tin un vision, nos tin un plan, y concretamente nos lo bin cu solucionnan efectivo y concreto pa cu combatimento di criminalidad. Mi por anuncia for di awor caba cu manera nos a anuncia un paar di siman pasa, aworaki nos tin un fecha concreto y nos ta spera cu den luna di Juli, tin entre otro akinan, sr. Peter Tarlow, internacionalmente reconoci pa siguridad di turismo pero tambe pa siguridad di pueblo en general. Peter Tarlow lo ta akinan pa un siman pa asisti nos y duna lecturanan pa asina brainstorm y probablemente ta spera di institui un curiculum, cu internacionalmente personanan trahando den e siguridad di pueblo y combatimento di terorismo y criminalidad, haci e curso na Aruba mes, pa asina duna un señal internacionalmente cu Aruba ta preocupa cu e ola di criminalidad, cu ta sutando nos pueblo” Bikker a bisa.
POR kier bin cu solucion pa esaki, dunado sesionnan di brainstorm tanto local como internacionalmente, pa duna atencion na e tema hopi preocupante aki, Bikker a conclui.