Biblioteca Nacional Aruba a ricibi un ehemplar di e buki pa mucha ‘Taty Frans, mucha di bientu i laman’ Ilustracion pa e buki ta di sra. Ariadne Faries. Denise de Jongh-Rekwest a coordina e proyecto y a haci redacccion final di e buki. Tanto Ariadne como Denise a bini Aruba diferente biaha pa e Festival di buki pa mucha di biblioteca.
Na Juli, Taty Frans, windsurfer profesional, naci na Boneiro, a bin Aruba pa competi na e di 30 Aruba Hi Winds.Taty Frans ta un surfdo Freestyle profesional. Na 2006 y 2010 Taty a sali na di dos luga riba e lista di clasificacion mundial di windsurf freestyle. Taty a diseña su propio fin freestyle pa planki di surf. Den e buki aki por lesa tocante di bida y aventura di e heroe Boneiriano. Na Biblioteca Nacional Aruba a ricibi un ehemplar for di man di un mucha hombe, sobrino di Taty. Asina muchanan di Aruba tambe por lesa ‘Taty Frans, mucha di bientu i laman’. E buki aki ta un iniciativa di Stichting Lezen & Schrijven Bonaire.
Fundacion Lesa Ta Dushi Bonaire CN tin un mensahe den buki pa mayor: ”Bo yu no por lesa ainda? Lesa pa bo yiu! Motibo pakico lesa pa bo yiu ta importante:…Lesa pa bo yiu no solamente ta dushi, pero tambe ta hunga un rol hopi importante den desaroyo di e yiu. Un mucha ta siña hopi ora ta lesa p’e. Na prome luga lesamentu ta hopi bon pa desaroyo di idioma. Durante lesamento e mucha ta siña palabranan nobo y con un frase corecto mester ta. Door di papia cu e yiu tocante e buki cu ta lesa for di dje, ta stimul’e pa ta mas activo cu idioma tambe. Na di dos luga muchanan ta siña scucha y concentra mas miho ora cu ta lesa pa nan. Lesa pa e yiu ta stimula su fantasia tambe. www.lezenenschrijvenbonaire.org