Diasabra ultimo, Biba Bida, programa pa nos grandinan di Cruz Cora Aruba a celebra Dia di San Valentin di un manera diferente. Den dos party bus, boluntarionan di Biba Bida a pasa rond Aruba y duna e grandinan un sorpresa na cura di cas.
Durante aña 2020, e programa aki a tuma un otro forma y a organisa su mes diferente, pa asina por sigui den contacto cu e grandinan den e programa. Cu e pandemia, cuidanando tur hende grandi, a activa un sistema yamada semanal. E voluntarionan, yama Biba Bida buddies, tabata asina keda pendiente di e grandinan, si nan falta algo, of si nan kier combersa. Tambe den 2020, Biba Bida a bishita e grandinan varios biaha na cas, tumando tur precaucion, pero tabata entrega un pakete di actividad. December a pasa rond y hiba un macuto di Pasco pa e grandinan.
Awor, pa Dia di San Valentin, Cruz Cora Aruba kier a haci algo special, y asina tambe pasa cuminda e grandinan na cas. Y riba dos party bus, na aire liber cu tapaboca, e Biba Bida buddies a tuma dos rumbo, pariba y pabou di brug. E biaha aki cu un pakete di prome auxilio pa e grandinan, incluyendo tapaboca, un fluit di emergencia, pleisters etc. Y pa pone e toke di amor y cariño…un bunita rosa!
Por a wak e caranan di alegria y sorpresa ora e grandinan a ripara cu nan tin bishita y caranan conoci di e buddies. Cruz Cora Aruba kier gradici Super Do-It, Sr. Carlos de Veer/CHICCO y Flora cu a colabora na Biba Bida riba caminda.