Clientenan fiel di Aruba Airlines y clientenan cu a scoge pa biaha den e proximo lunanan pa prome biaha cu e aerolinea cu ta carga nomber di nos pais, a acudi na nan di dos shopping night anual, cu a tuma luga siman pasa. Tur cliente a sali hopi contento cu nan super tarifanan y 15% di descuento riba tur ticket pa cualkier di e destinacionnan cu e aerolinea ta bula.
Tabata un anochi hopi ameno, cu e servicio amabel y cordial di e team dinamico di Aruba Airlines, compaña pa musica di Gaita Los Paranderos y Tsunami. Jessica Dirksz di Aruba Airlines a laga sa cu ta semper un placer y realmente ta manera un fiesta ora cu nan celebra cu e comunidad di Aruba cu nan ofertanan asina grandi.
Como cu hopi di e vuelonan pa luna di December tabata practicamente “sold out” caba, gerencia a dicidi di ofrece e descuentonan pa biahenan te cu fin di Augustus 2017 y asina a acomoda clientenan cu ta preparando nan biahenan pa gran parti di aña 2017, incluyendo Pasco Grandi y Vakantie Grandi.
E descuentonan aki ta con Aruba Airlines ta yama “masha danki Aruba” pa e sosten y amistad, Dirksz a agrega. Cada miembro di e staf y personal tin un compromiso cu nos comunidad pa cu nan biahe, sea ta pa negoshi, vakantie, un celebracion special of cualkier otro ocasion.
Clientenan por pasa libremente pa cualkier informacion di biahe of pa boek nan pasashi na e oficina di Aruba Airlines na Cumana. Si ta pa compra di un pasashi, por fabor corda trece un paspoort valido pa por pone e ticket riba e nomber corecto cu e informacion actual.
Aruba Airlines ta funda desde dia 31 di Januari 2006 y a realisa su prome vuelo dia 31 di Mei 2013. E compania Arubiano tin su oficina principal situa na Cumana 69 aki na Aruba. Aruba Airlines ta bula cu avionnan nobo y moderno, Airbus A 320-200 cu un capacidad di 150 pasahero, parti den 12 pasahero Business Class y 138 den Economy Class. Nan tin un total di 300 empleado staciona na tur nan oficinanan den tur nan mercadonan. Na Aruba so tin 139 empleado den servicio directo.