Den e ultimo simannan personal di Departamento di Aduana na Aeropuerto Internacional Reina Beatrix a bin constata cu hopi pasahero ta trece carga comercial den maleta. Departamento di Aduana kier a enfatisa cu ley ta prescribi cu e declaracion verbal di e biahero cu ta jega Aruba ta conta solamente pa mercancia di uzo personal. Esaki ta encera cu tur articulo cu no ta di uso personal y cu ta wordo importa pa uzo comercial mester haci un declaracion por escrito na
Aduana den e sistema di Asycuda.
Tene na cuenta tambe cu NO ta permiti tampoco pa paga mercancia comercial ariba recibo di pasahero na aeropuerto. E proposito di e recibo di pasahero ta exclusivamente pa paga ariba
mercancia di uso personal cu a surpasa e limite di exoneracion (lista di exoneracion ta disponibel ariba e website di aduana www.douane.aw).
Pa es motibo aki tambe Departamento di Aduana ta recomenda tur biahero cu ta trece mercancia comercial den maleta pa manda esaki como carga aereo pa evita stagnacion den
e proceso di saca e carga. Den caso cu personal di Departamento di Aduana constata carga comercial den maleta lo bay over pa wanta e carga te ora e documento di aduana, cu ta prescribi pa ley, ta cla. Tambe ta importante pa e biahero sa cu tin gasto adicional pa warda e maleta y cu e gastonan aki ta bin acerca di e gastonan di impuesto. Tin diferente motibo pa cual un biahero ta scoge pa bin cu e mercancia den maleta por ehempel tipo di producto of urgencia di transporte. Ta hopi importante pa e biahero cu ta biahando cu carga comercial den maleta haci tur tramite necesario prome cu yegada di e carga pa asina ey evita tur gasto adicional y stagnacion pa e carga wordo entrega.
Rekisitonan necesario pa por saca carga comercial treci como biahero ta:
1. Comprobante di registracion na Kamer van Koophandel
2. Persoonsnummer di compania,
3. E recibo di compra
4. Comprobante di e opslag den entrepot na Airport
Tur e datonan aki riba mester wordo entrega na e Customs Broker kende ta e persona autorisa pa traha e declaracion di Aduana. Pa un lista di Customs Brokers por acudi den buki telefon.
Departamento di Aduana ta spera cu tur persona biahando pa exterior pa haci compras cu un meta comercial tene bon cuenta di e aviso aki pa asina e carga no keda tranca na aeropuerto
innecesariamente.