AMSTERDAM, Hulanda – Boticarionan na Hulanda ta bende remedi destina pa e mercado Hulandes na companianan den exterior. Esaki por contribui na e escasez creciente di remedi na Hulanda. E compania di seguro VGZ kier pa un investigacion independiente wordo haci riba e comercio scondi aki, segun e corant Trouw.
Dos siman pada e organisacion di boticarionan KNMP a infoma cu na 2018 casi 800 remedi no tabata disponibel. Na 2010 esaki tabata apenas 170.
E escasez lo a bin door e prijsnan di remedi abao na Hulanda. Fabricantenan internacional pesey ta prefera di bende e medicinanan den exterior na un prijs mas halto. Mayoristanan haciendo esaki, ta conoci. Pero cu boticarionan mes ta haci esaki, no ta conoci segun Trouw.
Moralmente reprochabel
Jan Broeren di e organisacion GLN ta calcula cu entre 40 te cu 100 boticario cu’n licensia mayorista ta rebende e remedinan. “Mi ta kere cu’n boticario por gana miles y miles di euro cu esaki, te cu’n ton”, Broeren a bisa. “E no ta ilegal, pero si moralmente reprochabel, ya cu nan ta haci esaki cu remedinan cu ya caba tin escasez di nan”.
Boticario Paul Lebbink ta enfatiza cu e benta no ta ilegal. “Pero mi lo no haci esaki, ya cu mi pashentann ta bin na prome luga. Pa un comerciante esaki lo ta un consecuencia logico di e proteccion di mercado, pero boticarionan na prome luga ta dunadonan di cuido cu’n responsabilidad pa cu nan pashentnan”.
Lebbink ta sospecha cu e storia ta un conspiracion di e fabricantenan di remedi. “Ya cu e ta hopi fastioso pa nan cu otro partidonan tambe haya algun ganashi di esaki”.
Sonja Keizers tambe di e Asociación di Boticarionan Femenino (Nederlandse Vereniging van Vrouwelijke Apothekers) ta pensa cu tin algo mas. “Kisas e aseguradonan di salud a inventa e storia aki pa asina kita e atencion di e discusion tocante e politica di preferencia”.
Segun e maneho aki aseguradonan di salud mag di cubri solamente e variante mas barata di e remedi, pa cual e dokter di cas mester prescribi esaki. “Segun e aseguradonan di salud, e politica di preferencia en absoluto no ta e causa di e escasez di remedi”. Esaki no mester ta punto di discusion mes.
Miho bista
E compania VGZ ta di opinion cu ta tempo pa un investigacion, pa haya un miho bista. “Nos kier haya sa kico ta e posicion di Hulanda”, segun un vocero di VGZ. “Nos kier sa ki influencia e benta di remedi pa companainan stranhero tin ariba e escasez di remedi na Hulanda”. P’aworaki esaki ta solamente rumor y calculacionnan, no tin cifranan concreto”.
Segun Trouw boticarionan ta prefera di no papia ariba e tema aki. Un ta hasta papia di omerta, e deber mafioso di silencio. Boticiarionan cu ta bisa di ta na altura di e comercio aki, no kier nan nomber den corant.