Awe den oranan di merdia Benny Sevinger tabata den Corte. Su Abogado a haci un peticion na Hues Comsario pa lag’e den libertad. Esaki debi cu pa basta dia caba no tin interogacion mas.
Hues Comisario a scucha argumentonan tanto di defensa como di parti Ministerio Publico. A pone tur cos den balans. Despues di un rato di evaluacion Hues Comisario a dicidi cu no tin motibo pa mantene deteni, ya cu mayoria di e interogacion a tuma luga caba. Pa e motibonan aki a dicidi di lag’e den libertad te ora cu su caso bini dilanti mesa berde.
Benny Sevinger lo sali for di KIA awe tardi 4’or, naturalmente bou di cierto condicionnan.
Sevinger ta un di e politiconan cu a saca nan mes durante eleccion parlamentario di dia 25 di juni ultimo. Sinembargo Gobernador a dicidi cu lo no hurament’e, dia 8 di juli ultimo, pa motibo cu e ta cera den KIA. E lo haci esaki na momento cu e ta den libertady por eherce su trabou debidamente.
Awo cu e ta liber probablemente lo haci e peticion pa e wordo huramenta. Mientrasanto, e fiscal encarga cu e caso mr. Gerretschen a bolbe Hulanda despues cu su contracto a vence. Pues e caso ta den man di fiscalnan nobo cu a yega recientemente di Hulanda.
E politico, no. 29 riba lista di AVP, ta un sospechoso den investigacion caso Avestruz, bendemento di tereno di gobierno.
Version oficial di OM
Esaki tabata e version oficial cuOM a manda un rato pasa:
Awe entrante 16.00’or e detencion di señor Sevinger a keda suspendi. Huez-comisario a dicidi esaki riba peticion di e abogado.
Ministerio Publico no a verzet su mes contra esaki. Si Ministerio Publico a pone condicionnan na e suspension, cu a wordo acepta pa huez-comisario. Ta asina cu e investigacion penal ta casi full cla.