Un dia despues di a recobra su libertad condicional, Benny Sevinger, a haya carta di Gobernador Alfonso Boekhoudt.
E carta fecha 4 di augustus ta titula Yamada pa Huramentacion. Den e carta ta informa Sevinger cu su huramentacion ta tuma luga diabierna awo pa 1.30 di merdia na oficina di Gobernador. E por trece solamente dos invitado.
Manera por corda, miembronan nobo di Parlamento a huramenta dia 8 di juli ultimo, cu excepcion di Benny Sevinger. Gobernador Boekhoudt a nenga di hurament’e mientras cu e ta cera den KIA. E consecuencia tabata cu for di e fecha ey Aruba tabatin solamente 20 parlamentario en bes di 21.
Mientrastanto den partido AVP, por a compronde, tin hopi mal contento bou di e candidatonan cu a participa den e ultimo eleccion. Tin sigur dos cu ta evaluando pa retira di partido y tambe retira di politica, mientras cu otro ta pensando pa retira di partido. E turbulencia ta grandi aunke cu e lider ta haci intento pa mantene e union.