Benjamin Romero cu entrega di su buki na Aruba Tourism Authority

Manera ya ta conoci den nos comunidad, Benjamin Romero a skirbi un buki tocante historia di comercio di koffie na Aruba durante e siglo cu a pasa. E buki ‘E negoshi di koffie na Aruba’ a wordo publica pa prome biaha dia 6 di december 2016.

Personahenan clave envolvi den e comercio aki tabata entre otro Carlos “Cay” Wolter, cu ta esun cu a planta e simia di e negoshi aki na Aruba. For di añanan 1950, Wolter tabata e pionero di e negoshi di koffie for di nos isla pa exportacion cual a desaroya grandemente. Hunto cu Wolter a cuminsa Lionel “Nel” Harms, pa cual Wolter a sirbi como su mentor comercial cu e arte y trikinan pa cu negosha koffie cu e Colombianonan, for di unda e koffie tawata yega Aruba.

E comercio di koffie na Aruba ta mustra nos e lasonan comercial entre Aruba y Colombia cu ya pa hopi tempo tabata existi. Un otro figura clave den e negoshi tabata David Cybul, un Colombiano cu a yega Aruba y a converti den un homber importante pa cu comercio pa Aruba.

E buki interesante aki a haya bon acohida na Aruba y na mei e aña aki, Romero a dicidi pa publica un edicion di e buki aki den idioma Ingles, pa asina nos bishitantenan tambe por conoce e storia aki y e historia di Aruba.

Durante un bishita di cortesia, e autor local Benjamin Romero cu por cierto ta un periodista bon conoci na nos isla, a haci entrega oficial di un ehemplar di su buki titula ‘The Coffee Trade In Aruba ‘ na e CEO di Aruba Tourism Authority (ATA), Ronella Tjin Asjoe-Croes.

Cu e publicacion aki, un diferente angulo ta wordo comparti pa cu e historia di nos cultura. Un Angulo cu sigur A.T.A. lo usa pa asina brinda otro bista di Aruba y nos cultura y historia.

 

Comments

comments