KINGSTOWN, St. Vincent- Paul Gravel, fundado y director di St. Vincent & The Grenadines Air (SVGA) ta convenci di cu belasting ta cabando cu tur compania den e region Caribense.
Recientemente Glavel a expresa su preocupacion pa cu e negoshi di transporte aereo den un entrevista na radio.
Segun Glavel, belasting a yega na un punto te na e nivel caminda cu e pueblo no por paga e gastonan di un pasashi, cual tin un efecto devastador pa cu e aerolineanan Caribense.
En ta sinti cu gobierno di varios pais den Caribe ta wak belasting ariba pasashi como un manera facil di genera entrada pa proyectonan, cual, den hopi di e casonan, ta demasiado caro.
“Aviacion pa hopi gobierno Caribense ta manera un ‘baca lechera’. Bo por sigui saca lechi for di e baca y na principio lo bo haya lechi, pero dado momento e baca lo bira malo y lo no sigui duna mas lechi. Esaki ta exactamente loke ta pasando cu e industria di aviacion den Caribe.
Gavel ta basa su mes ariba e hecho cu un estudio reciente haci door di Caribbean Development Bank a mustra cu no menos di 54% (!) cu prijsnan di pasashi awendia ta consisti di solamente belasting mas e gastonan.
Si cosnan sigui asina e ultimo aerolinea Caribbean Airlines tambe lo mester cera su portanan. “Tin algun aerolinea local ainda, manera SVG y Mistique Airways, pero si cosnan sigui manera e ta awo, nos tambe lo mester cera nos portanan”, Gravel a bisa.