Director di Directie Scheepvaart, Sr. Carlyle de Coteau a splica cu e ley di beach policy t’ey, pero mester di cooperacion di mas departamento di gobierno pa e beach policy por traha.
Directie Scheepvaart ta bezig cu esaki, pa bin cu un advies pa Minister di Transporte y e Minister di Husticia, con por pak aan e problema aki. Pero e problema ta sinta cu e toezicht riba beach ya cu KPA a informa cu nan no tin hende dedica pa patruya ariba beach. si tin polis riba beach, si tin maritiem politie, pero e strandpolitie, cu por a compronde, cu e strandpolitie ta mas bezig cu incidentenan cu ta tuma luga den hotel mes. Un robo chikito, of dos turista ta bringando cu otro. Problema na front desk, etc. Dus cosnan aki ta pasando y nan ta wordo ingezet pa soluciona e problemanan chikito akinan, pero no riba beach.
Directie Scheepvaart lo actua mas severo cu e beach policy, si bo comete dos infraccion grandi, e chance ta grandi cu e lo revoca e vergunning. Pero Directie Scheepvaart lo mester di e procesverbaal aki. Aworaki a manda un advies aden tanto pa Minister di Husticia y Minister di Transporte, pa pone esaki den funcion mas pronto posibel.
E punto cardinal pa enforsa e beach policy ta e cooperacion di Cuerpo Policial. Polis ta esun cu ta duna boet ora di cualke infraccion y esaki ta conta tambe pa e beach policy. Ariba lama, tin e parti di toezicht houders, ta wardando ariba e opleiding na scol di polis pa e toezichthouder na Directie Scheepvaart pa e BOA opleiding y Sr. de Coteau ta spera cu e curso por cuminsa ainda e aña aki, pa keda cla cu esaki pa por tin extra control ariba beach.
Den cualkier caso, si mester bisa cu Directie Scheepvaart tin bon cooperacion cu Kustwacht, ta haya sosten di Maritiem Politie. Sr. Benschop, director di Maritiem Politie ta duna tur su cooperacion.
Na final, Sr. De Coteau a bisa cu mester di mas polis patruyando ariba nos beachnan, pa asina tur cos por cana manera debe ser.