Desaroyo monetario
Compara cu augustus 2018, den e luna di september 2018, e cantidad di placa den circulacion a baha cu Afl. 16,8 miyon te na Afl. 4.371,6 miyon, Esaki a resulta door di un caida den e reserva di divisa netto (-Afl. 26,4 miyon) y un subida den e activo domestico netto (+Afl. 9,6 miyon).
E reserva di divisa netto di e sector bancario a disminui debi na benta netto di divisa na publico (-Afl. 201,9 miyon), primordialmente relaciona cu entrada for di importacion di mercancia y otro servicionan. Esaki a wordo mitiga pa un gran parti pa compra netto di divisa for di publico relaciona cu entrada for di turismo (+Afl. 175,5 miyon).
E subida den e activo domestico netto a wordo causa pa un crecemento den credito domestico (+Afl. 32,3 miyon), cual a wordo mitiga parcialmente pa un bahada den transaccionnan no relata na credito (-Afl. 22,6 miyon). E desaroyo den credito domestico a resulta for di mas credito bancario na e sector priva (+Afl. 42,1 miyon) mitiga parcialmente door di menos credito bancario netto na e sector publico (-Afl. 9,8 miyon). E aumento den credito bancario na e sector priva ta debi na un expansion di credito na empresa (+Afl. 30,1 miyon), hipoteca pa vivienda (+Afl. 11,7 miyon), y credito na consumidor (+Afl. 0,3 miyon). E bahada den credito bancario netto na e sector publico a wordo causa door di un aumento den e depositonan di gobierno (+Afl. 10,8 miyon).
Inflacion
E nivel general di prijs, cu ta wordo midi door di e indice di prijs di consumo, a registra un subida di 4,9 porciento den e luna di september 2018, compara cu september 2017. E contribuyentenan principal na e aumento aki ta e componentenan “Transporte”, “Cuminda y Bebida No-Alcoholico” y “Recreacion y Cultura”. Si exclui e componentenan di cuminda y energia for di e indice di prijs di consumo, inflacion a mustra un aumento di 2,7 porciento compara cu september 2017. Pa loke ta trata e promedio anual di e tasa di inflacion, esaki a registra 2,3 porciento na september 2018, compara cu 1,8 porciento na augustus 2018.
Turismo
Na september 2018, e cantidad di turista a registra 76.017 bishitante, cual ta 1.627 bishitante (2,1 porciento) menos cu na september 2017. E bahada aki a resulta for di un caida den e mercado Latino Americano (-4.937 bishitante of -24.4 porciento) mitiga pa un gran parti pa un subida den e mercado Norte Americano (+3.781 bishitante of +8,2 porciento).
E caida den bishitante di e mercado Latino Americano ta debi na un bahada den bishitante for Venezuela (-6.035 bishitante of -52,2 porciento), mientras cu e subida den e mercado Norte Americano ta relata principalmente na mas bishitante for di Merca (+3.651 bishitante of +8,4 porciento).
E cantidad di turista crucero a registra un crecemento di 17.151 bishitante of 71,9 porciento te na 41.014 bishitante na september 2018, compara cu september 2017. E cantidad di barconan a subi for di 12 na september 2017 pa 13 na september 2018.
Entrada di Gobierno
Na september 2018, entrada di gobierno a suma Afl. 96,1 miyon, cual ta Afl. 1,6 miyon menos compara cu e mesun luna di e aña anterior. Esaki a resulta for di un bahada den entrada no relata na impuesto (-Afl. 8,2 miyon) y un subida den entrada di impuesto (+Afl. 6,7 miyon).
E subida den entrada di impuesto ta relata principalmente na mas entrada for di impuesto riba benta di negoshi (B.B.O./B.A.V.P.) (+Afl. 7,5 miyon) debi na e introduccion di B.A.V.P., impuesto riba divisa (+Afl. 2,3 miyon), y impuesto riba importacion (+Afl. 2,7 miyon). E crecemento aki a wordo parcialmente compensa pa un bahada den entrada for di accijns riba gasoline (-Afl. 4,7 miyon).