Banco Central di Aruba(BCA)ta contento di tuma nota cu CBS a reanuda su publicacion oficial di e Cuentanan Nacional, despues di a publica esakinan pa e delaster biaha na aña 2011. Aruba atrobe ta dispone asina di informacion indispensabel riba tereno di economia di nos pais, esta e producto domestico bruto (PDB) y su composicion, calcula na e manera mas precies posibel.
Te na e momento aki, CBS a publica e PDB di e añanan 2013 te cu 2017. Esaki ta nifica cu BCA lo reemplasa su calculonan publica durante y riba e añanan aki, cual tabata basa riba informacion obtenibel e momento ey y cual tabata limita, cu cifranan di e PDB oficial di CBS. BCA lo por dedica su mes na e proyeccionnan di e PDB pa e siguiente añanan, cuminsando cu 2018.
E diferencia di e serie 2013‐2017 di PDB publica recien pa CBS cu e calculonan di BCA publica den pasado lo ta suheto na analisis interno mas profundo, y unda ta necesario lo tin discusion amplio cu CBS, cu e proposito tambe pa yega na miho calculonan di e PDB den futuro