BBO ta dirigi na e comerciante y no na e consumidor. Pa ley e comerciante mester paga BBO riba su benta y no e consumidor riba locual e ta cumpra.
BBO ta gasto pa comercio cu nan por deduci por completo
Como cu BBO ta un gasto pa e comerciante, ley ta permiti pa e comerciante kita esaki for di e impuesto cu e mester paga riba su ganashi. Ora ta trata di Sales Tax, un comerciante no por kita esaki como gasto como cu Sales Tax ta e consumidor ta page. Pues BBO ta un gasto pa comercio y no un obligacion pa consumidor.
BBO no mester ta riba recibo
Den un sistema di Sales Tax, e mester aparece riba e recibo pa asina e consumidor sa kiko e ta paga na Gobierno como impuesto. BBO NO ta Sales Tax, pesey e no mester aparece riba recibo. Ta e comerciante y no e consumidor mester paga BBO. E tarifa di BBO cu e comerciante mester paga na Gobierno ta 6 % di locual e genera na benta.
Mas transparencia ora di paga
Awor cu BBO no mester aparece riba factura, e consumidor sa di antemano cu e prijs cu tin poni riba e producto ta e prijs cu e ta bay paga na caha. No mester bin sopresa mas cu ora di yega caha ta cobra 6% of 6,38% of otro suma cu no ta 6% cu tabata wordo cobra bou capa di BBO. Pa caba cu e caos aki y trece mas transparencia pa e consumidor a haci cambio pa laga e BBO keda for di e factura y pa BBO keda ta e impuesto cu ta wordo paga door di e comerciante na Gobierno y pa no sigi wordo considera como e Sales Tax dirigi na e consumidor.