Sra. Fina Pourier ta duna informacion riba e Bazaar di Centro Kibrahacha cu lo tuma lugar Diadomingo awor. Lo bai tin bar y cushina bon surti y un tremendo BBQ y plato di Teriyaki Chicken. Tambe lo bai tin un mini market, mercado di purga, benta di paña y tambe benta di mata. Sra. Pourier a sigui bisa cu lo tin un skina cu weganan pa mucha cu premio y tambe ta bai tin benta di bolo dushi, coffee y obranan di man y tambe un info desk p’asina tur hende por haya informacion adicional di Centro Kibrahacha. Pues pa grandi y chikito ta bai tin actividad pues ora cu e grandi ta disfruta di su musica e muchanan tambe ta disfruta. Pa loke ta ambiente musical lo bai tin presentacion di diferente gruponan di gaita, cantantenan local, Robert Thiel “riba wiel” y pa clausura den oranan di atardi lo bai tin Rincon Boys. Manera ta custumber entrada pa asisti na e bazaar aki ta completamente gratis y bo contribucion ta loke bo cumpra durante e bazaar mes. Mester bisa cu tur cos ta cla caba y tur e lugarnan ta ocupa caba kiermen cu cosnan lo bai ta hopi bon pa e Diadomingo aki 3 di November 2019. Sra. Pourier kier a invita pueblo di Aruba completo pa asisti y duna bo aporte na Centro Kibrahacha y alavez goza di tur loke tin di come, bebe, cumpra y baila riba tononan musical di nos artistanan local. Meta pa cu e bazaar aki ta pa logra yega na un bus p’asina por transporta e clientenan cu tur dia ta bin disfruta di Centro Kibrahacha.