Diasabra 22 di maart ultimo, dos ekipo di Aruba a dal un training amistoso pa determina ken lo ta e “Cacique” di Aruba den e torneo amistoso venidero entre e islanan Aruba, Bonaire, Y Corsow. E flamante Team Snor, bou guia di e enigmatico Nelson “Snor” Perez, a enfrenta e ekipo di Balashi Knights. Ambos team ta participa pa representa Aruba, pero toch no ta malo practica un tiki y establece manera nan ta bisa na Hulandes, e “pikorde”. Wel, shonnan, tocante lo ultimo, a keda estableci claramente cu Balashi Knights actualmente ta “somewhere at the bottom of the food chain”!
Na cuminsamento ainda no tabata bisto cua team lo t’e “champ” p’e anochi ey, pero pa banda di halftime, despues c’un integrante polis a pretende di por a pone ordo den tacticanan di domino, e ekipo cu mas perspectiva a resulta di ta Team Snor ora nan a drenta halftime cu score di 11-7.
Despues cu e cachetenan a mula e pasapalonan bon mula, tabata parce cu tabatin un diferencia entre e snacknan cu Team Snor a haya y esnan cu Balashi Knights a come! Esnan di Snor parce tabata traha cu “energydrinks”, ya cu den un frega di wowo e ekipo bou guia di Snor a pasa laga Balashi Knights leu atras ora cu nan a gana cu score “palindromordnilap” di 21-12! Who’s da boss den e torneo ABC cu lo cuminsa diahuebs awor? Team Snor sin duda.
Papiando dje torneo aki cu lo cuminsa na Club Primavera, diahuebs 27 di maart awor pa 8’or di anochi, lo siguiente: lo ta bay tin 6 team participando, dos di Aruba, esta Team Snor y Balashi Knights DT, dos di Bonaire, esta Rincon Stars DT y Angel Stars DT, y dos di Corsow, esta Nos Ambiente DT y E Piedra DT. E torneo lo cuminsa diahuebs 27 di maart pa 8’or di anochi y lo caba diadomingo. Detayenan den e torneo aki ta cu lo hunga segun regla di Aruba, dus te 100-tanto, y tambe cu ekiponan di mesun pais no lo enfrenta otro. Mas detaye dje torneo lo sigui durante cobertura dj’esaki. E meta dje torneo aki ta pa promove amistad y hermandad entre islanan ABC y muy en special den e comunidad di hungadonan di domino dje tres islanan. Entrada ta completamente gratis y un invitacion ta bay pa pueblo en general pa bin pasa un rato ameno y disfruta di domino di prome categoria dje hungadonan di Aruba, Bonaire, y Corsow.
