Kralendijk Boneiro: Entretantu 15 reshèrshi di Nationale Politie a yega Boneiru for di Hulanda pa yuda den e investigashon DRUM. E kordinashon di e tim di investigashon tin awor un tim amplio di reshèrshi kaminda tin tambe representashon di spesialistanan spesífiko pa e tipo di kasonan aki. For di despues di e insidente, reshèrshinan di Recherche Samenwerkingsteam (RST) di Boneiru i Kòrsou ta yuda den e kaso aki, tambe Koninklijke Marechaussee (KMar) tin un tim kompleto na Boneiru pa yuda e reshèrshinan di KPCN. For di kuerpo polisial di Aruba i Kòrsou tambe tin reshèrshinan ku konosementu spesialisá ku ta yuda den e investigashon.
Banda di esei KPCN tin yudansa di personal di defensa, di Warda Kosta, duana, Nederlands Forensisch Instituut (NFI) i tambe di Kuerpo di Bombero Hulanda Karibense.
E yamada ku Ministerio Públiko BES i polis a hasi na komunidat di Boneiru pa duna tep a ser skuchá pasobra e tim a haña vários tep balioso.
Entretantu a determiná ku e munishon ku a alkansá e agente polisial ku a pèrdè su bida no ta prosedente di munishon di polis.
E investigashon awor ta den e fase kaminda tur informashon disponibel ta keda investigá i kompará ku otro. Naturalmente ainda e tim ta kolektá i ta pidi informashon.
Na komienso di e siman aki a detené un hòmber ku tabata e usuario di e bus koló blanku ku den e investigashon ta ser konsiderá komo sospechoso.
Detenshon tabata nesesario pa investigá si e hòmber di kualke manera ta enbolbí den e echonan ku ta den investigashon.
No tabatin sufisiente motibu pa prolongá su detenshon preventivo, pa e motibu aki, riba 25 di ougùstùs, a laga e hòmber aki den libertat, pero e ta keda sospechoso. A konfiská e bus i ta realisando investigashon na esaki. Despues di esei lo duna e bus bek. Den kuadro di e investigashon den e fase aki no por duna mas informashon riba e resultadonan di e investigashon hasí.
Polis i Ministerio Públiko atrobe ta pidi komunidat pa duna tep i pa mèldu kosnan partikular ku por tin di aber ku e kaso aki na e tim investigativo.
En todo kaso, e yamada pa duna informashon riba e pèchi, armbant i oloshi, ku a duna anteriormente, ta keda importante pa e investigashon. E tim investigativo ainda ta buska un persona ku dia 17 di ougùstùs a sufri leshon grave probablemente okashoná na momentu ku e lo a kai for di haltura.
Anteriormente a pidi komunidat pa yuda ku informashon riba un hòmber ku lo tin uñá den su kara, tambe e sospechosonan lo a haña hinká di sumpiña. Si bo konosé un persona ku tin e tipo di leshonnan aki, por fabor tuma kontakto ku polis.
Personanan ku por ta den peliger serio òf pa otro motibu urgente por duna nan informashon solamente di forma anónimo, pa e kaso spesífiko aki por yama direktamente e servisio di inteligensia (Criminele Inlichtingen Dienst). E departamento di polis aki tei pa garantisá anonimidat di hendenan ku ta duna tep. Pa esaki por bèl e number 795-5746. Si personanan yama e liña di tep anónimo i ke pa yama nan bek, ta bai un súplika pa laga e number di telefòn atras.
Bo sa mas di e kaso aki? Tuma kontakto urgente ku polis via di e number di telefòn ariba menshoná. Tur otro informashon relashoná ku e insidente aki ta mas ku bon biní. Tambe por hasi uso di e liña di tep general di polis 717-7251.