Sra Velvet Zoe Ramos a splica riba desaroyonan di un investigacion cu a ser haci pa actividadnan den bario cu ta haci falta sigur den Rancho.
Como artista den Residencia na Centro di Actividad Rancho, e ta haciendo un proyecto cu lo por wordo describi como un proyecto di comunidad, den arte visual y relacional tambe. Esaki kiermen cu e proyecto ta wordo forma, e ideanan, e concepto, y despues e material o e arte ta bay wordo traha a base di e community su input, su informacion, loke nan kier pa traha, loke nan kier soluciona. Cu esaki e kiermen, nan ideanan pa loke ta e Comunidad di Rancho, un di e preguntanan cu e ta haci na e comunidad, ta si tin un community, si tin hopi y si nan ta willing pa traha uno cu otro.
Esey ta basa ariba e hecho cu Rancho tabata tin un comunidad basta fuerte y tin nostalgia pa esey. Lo kier wak si por uni atrobe y haci un diferencia den e bario atrobe, pero cu un idea mas sostenibel. Sra. Ramos su plan ta prome, pa haci pregunta. E kier sa, pa motibo cu tin hopi cos cu hende ta bisa, cu falta esey y esey, pero no cu tin uniformidad den esey. Den investigacion haci caba, cu universidad a bin haci un investigacion di e bario, e ta basta amplio, no tur hende ta di acuerdo cu kico mester wordo haci.
Sra. Ramos a sigui splica cu e no por priminti algo vast, pero ta cuminsa papia cu e hendenan cu si por haci un diferencia. Pero e prome cos ta, pa e hendenan di e bario aki mes haya un amor pa e cosnan aki. Antes tabata tin hopi club, hopi cosnan pa haci. Hopi unidad, y esaki a disparce pa falta di interes.
Tambe Sra. Ramos a splica cu e tey na Centro di Actividad Rancho, pa hendenan bin papia cun’e di nan experiencia, di nan testimonio, di nan sugerencianan y e ta haci un record di esaki. Kisas sigui cun’e den proyectonan chikito, colaborando tambe cu Luis Villegas y su publicacionnan. Y tur e actividadnan cu Stichting Rancho ta produciendo durante e lunanan di Mei te cu September.
Durante e tempo ey, por haci cu mas 5 evento unda cu e comunidad ta reuni cu e ideanan cu nan ta produci pa haci un accion. E eventonan lo ta varia, si e persona kier un les di pintamento, tene un fiesta di hacimento di aña. Pero e idea ta pa forma un comunidad. Tur esaki lo wordo archiva, unda cu kisas un dia lo tin un libreria comunitario unda cu muchanan kier bin haci estudio di nan bario, unda cu nan por haya esaki. Asina Sra. Velvet Zoe Ramos a termina bisando.