Accion contra personanan of doñonan di cacho neglisha, peligroso, cana los ariba caminda publico of otro tipo di infraccion den ley di cacho ta continua!
Durante e accion di control cu a tuma lugar den algun bario di Noord a tuma nota di varios infraccion pero a logra atende cu bintinuebe (29) persona of doñonan tocante diferente infraccion di ley di cacho.
E personanan aki no a tuma precuacion suficiente pa asina e cacho por ta bon cuida. Diezcinco (15) persona a haya un multa mesora y diezcuater (14) a haya un aviso. Mester tene cuenta cu e multanan ta cuantioso y tin afecto pisa pa bo cartera.
A haci diferente control den bario nan di Noord manera: Semeleerstraat, Fiigaroastraat, Eckmeyerstraat, Frankenstraat, Monserat, Montaña, Sabana Liber, Noord, Turibana, Kamay, Sero Pela, Saliña Cerca, Bakval, Opal, Safir, Esmeralda, Topaz, Boegoeroei, Alto Vista, Kurimiauw, Catiri, Seroe Janchi, Shiribana, Matadera, Tanki Flip, Moko, Papaya, Cunucu Abou, Washington, Caya Cangreu y Palm Beach.
E controlnan aki lo continua den otro barionan inespera. Ta haci un suplica pa cuida bo cacho, mantene bo mes na e ley y reglanan tocante cacho y preveni di haya un multa indesea. E multa ta halto y lo por tin consecuencia pa bo cartera.
