Barconan petrolero Venezolano ta sigui manda petroleo pa Cuba

E barconan petrolero Ocean Elegance y S-Trotter sanciona door di Merca a cambia ann nomber y awo ta yama “Oceano” y “Tropic Sea” respectivamente.

E barconan petrolero Venezolano ta haci tur sorto di maniobra pa sigui hiba petroleo pa Cuba y asina evadi e sancionnan impone door di Departamento di Tesoro di Merca, segun e agencia Bloomberg.

Segun e portal di noticia, e barconan petroleronan ta cambia e canal di recepcion y ta cambia e nomber di e barconan petrolero pa no wordo rastrea door di gobierno di Merca.

Mas aleu, segun datonan copila door di Bloomberg, e barconan Ocean Elegance y S-Trotter sanciona pa Merca a cambia nan nomber pa “Oceano” y “Tropic Sea” respectivamente.
Mester enfatisa cu e barco petrolero “Nedas”, a wordo sanciona na april y mas despues el a haci entrega di crudo na Cuba despues di a cambia su nomber pa “Esperanza” y a paga e GPS. Despues di 42 dia e barco a wordo detecta atroba y segun informenan el a haci entrega di crudo na Cuba.
Door di e insistencia di e regimen Venezolano di sigui manda petroleo pa Cuba, e vocero di e Conseho di Siguridad Nacional di Merca a indica cu “Merca lo sigui sanciona entidadnan cu tin como obhetivo di corta ainda mas e acceso di Maduro y su amigonan na e fondonan deriva di e benta di petroleo na Cuba”.
Mientras, e economista Venezolano, Jose Toro Hardy, den un entrevista a bisa cu Maduro ta sigui manda 60 mil bari di petroleo diariamente pa Cuba, el a enfatisa cu e actividadnan di e regimen ta pa evita e sancionnan cu ta “situacionnan cu niun compania serio lo haci”.

Comments

comments