ROMA, Italia- E descubrimento horibel diadomingo di mas di dos docena di mucha muhenan migrante riba Lama Mediteraneo a laga autoridadnan asombra. Pregunta ta surgi awo, si e mucha muhenan a wordo mata a proposito, pa malo y dicon tur esunnan cu a muri ta femenino.
Lorena Ciccotti, hefe di polis den ciudad porturario di Salerno, a bisa cu autoridadnan a cuminsa cu’n investigacion den e causa di morto di e mucha muhenan y asina saca afo si nan a wordo tortura of sexualmente abusa. Ta papia di 26 mucha muhe, tur procedente di Nigeria y edad ta varia di entre 14 pa 18 aña y a muri den e biahe peligroso for di Libia pa Europa den fin di siman.
Libia ta e trampolin mas grandi pa migrantenan Africano, cu tin speransa di tin un miho biba na Europa. Ta trata di migrantenan di e region Sub Sahariano cu kier huy for di pobresa of guera, ta probecha di e bashi di poder na Libia. Migrantenan deseando yega Italia, cu ta cerca di Libia haciendo Libia un pais cu ta centro di contrabando humano.
Curpa di e adolescentenan a wordo haya den Mediteraneo pa un barco Spaño, cu a baha un “cantidad infinito di saconan preto di cadaver” den e puerto di Salerno. E curpanan a wordo poni den cahanan di morto, según AFP. Binti tres di e hobennan a wordo descubri cerca di un boto chikito di rubber, cual autoridadnan ta pensa cu lo a zink diabierna.
E biahe riba Meditareano ta uno mortal, cerca di 58 porciento di e refugiadonan cu a muri e aña aki durante nan biahe interfronteriso a muri hoga, segun e Organisacion Internacional pa Migracion.
Tur cos ta indica cu e hobennan lo a wordo tira for di nan boto di rubber y e causa di morto lo ta hogamento.
E barco Spaño diadomingo a logra rescata 90 muhe 52 menor di edad, incluyendo un recien naci. E rescate ta un di e cuaternan cu hunto a logra rescata 400 hende den curso di weekend.
Fuente: https://www.washingtonpost.com