RIOHACHA, Colombia- E barco- hospital USNS Comfort di Merca a cuminsa cu su labornan humanitario den e ciudad Colombiano Riohacha, unda cu ya caba el a atende 894 pashent, den su mayoria Venezolano. Tambe a realisa 11 cirugia caba, segun fuentenan diplomatico a informa.
Dos di nan, Rubilet y su yiu Emily, e emigra for di Maracaibo y a bay biba na Riohacha, unda cu e menor a wordo opera na su wowo drechi, pa un lipoma. Tabata imposibel pa a haya un dokter den e hospitalnan Venezolano, segun e embahada di Merca a bisa den un comunicado.
Riohacha, capital di e departamento di La Guajira, ta un di e enclavenan cu mas migracion Venezolano a ricibi pa e crisis cu e pais aki ta bibando, debi su su cercania cu e frontera di e nacion petrolero.
Esaki ta e di cinco biaha cu e barco ta bin Colombia, como parti di su esfuerso regional di e Comando Sur di Merca, cu ta inclui bishita na Peru y Ecuador y lo sigui cu su labornan na Honduras, unabes cu e mision na Colombia yega na su fin.
E atencion medico a wordo realisa den e edificio di e scol Divina Pastora, mientras cu e cirugianan a wordo haci riba e barco.
E tripulacion di e barco ta inclui mas di 200 dokter, zuster – y tecniconan militar Mericano y di otro nacionnan, ademas di casi 600 profesionalnan medico boluntario y dentistanan di varios ONG.
E USNS Comfort a yega na e costanan di La Guajira diasabra ultimo procedente di Turbo, den e departamento di Antioquia (noordoost), unda cu a atende 727 pashent y a realisa 39 cirugia.
E barco lo keda na Riohacha te cu diabierna, segun EFE a informa.