Dialuna 29 di october e avion Dash di Warda Costa ta tuma nota di un barco den e awanan entre Bonaire y Corsou. E barco tabata parce un barge. Diamars, 31 di oktober e barco tabata pafo di e costanan di Corsou, cerca di Awa Blanku.
Frisc, e embarcacion interceptor di e Marine Real a sali bay pa saca potret di e barco. No tabata trata aki di barco Ro- Ro ( roll on- roll of) cu a zink. Durante investigacion di Rescue & Coordination Center (RCC) di Warda Costa a sali na cla cu dia 12 di oktober caba e barco aki a zink despues cu el a sali for di Trinidad, rumbo Venezuela. Den e embarcacion tabata tin 5 persona abordo, di cual 4 a wordo rescata door di un piscado di Trinidad. E di 5 persona ainda ta perdi. Tin e sospecho cu e persona aki ainda ta abordo di e barco cu a zink.
Ta buscando e posibilidadnan pa bay duik diahuebs pa averigua si e persona perdi lo por ta abordo ainda di e barco. E Stationsship marca e sitio cu luz caminda cu e barco a zink y RCC lo manda un mensahe di aviso na tur barco cu ta nabegando den awanan teritorial di Corsou.
ULTIMO ORA
Informacion cu nos redaccion ta dispone di dje ta cu e barco ta moviendo for di su luga, na unda el a zink. Al parecer, e barco aki a move asina tanto cu ya caba e ta drentando awanan teritorial di Aruba, pa cual tanto Warda Costa di Caribe Hulandes como Guarda Nos Costa di Aruba, ta monitor esaki.