Segun presidente di SADA, Eduard Maduro, Barcadera ta keda un reto grandi pa empleadonan di Douane.
A sinta cu minister president, a sinta cu minister di finansas y tambe minister di husticia, pa splica nan di e asunto di Barcadera. Pero lamentablemente nan ningun no por a haci nada pa esaki pasobra e ta den man den cartera di minister di turismo. Desde e tempo ey a busca manera pa haya reunion cu e minister encarga. E situacion ta Status Quo na Barcadera. Hendenan ta disgusta y e trabao riba su mes, unda a pidi pa pone un minimaal bezetting pa asina sigura cu tin tanto trahado na pia di trabao no a sosode. Tin hopi mal contento den e seccion aki, caminda cu tin un hefe cu ta guia e seccion aki, unda cu no ta tene na cuenta cu e trahadonan. Ta inventa orarionan hopi straño. Tin un hefe cu ta suppose di traha dagdienst, pero e mes ta traha su orarionan. E ta subi den oranan di marduga y ya 10’or e ta bay cas. Un hefe di un seccion ta suppose pa dirigi e cuerpo durante dia. No sa si esaki ta cu blessing di e director of no, pero si ta asina, esaki ta bay en pugna cu ley, pasobra ley ta bisa cu kantooruren ta 7’or y mey pa 4’or y mey. Awo a para bira cu cada ken ta cuminsa diseña nan oranan di trabao y ta bay en pugna cu ley. Si e director tin conocemento di esaki, SADA ta lamenta esaki grandemente.
Di parti di e sindicato, Maduro a splica cu nan tin e coleganan na seccion di waf na Barcadera ta monitor e situacion y ora nan a keda di tuma un decision kico ta bay haci y pa laga e sindicato sa ki paso ta wordo tuma conhuntamente. Waf ta un desaster henter e aña. Ningun hende a tene Douane na cuenta. Tin compania priva ta haci control riba Douane. Tur parti di mundo, Douane ta esnan cu ta maneha e waf. Awor aki tin un compania priva ta haci control riba Douane, cual pa nan ta inaceptabel. Awor cu e situacion na aeropuerto y na waf ta mesun cos. A pidi arma pa personal. Minister a duna opdracht pa e director ehecuta esaki y nada di esaki no a sosode ainda. No ta compronde kico ta pasando cu esnan cu tin cu hiba e cuerpo padilanti. E ta di lamenta pasobra, e coleganan ta disgusta. Ora cu trece informacion minister ta duna opdracht pa arma cuerpo di douane na Aeropuerto, esaki no ta sosode, a pasa trabao y dolor di cabes pa lobra arma waf. Despues di hopi contratiempo di parti di director mes, pero na final a logra. Awor aki, despues di casi un aña cu e minister a duna opdracht pa arma aeropuerto, te ainda nada no a sosode. Tin hopi cos cu ta sosode. Hendenan ta disgusta. Ta lamenta tambe cu e cosnan aki ta pasa y segun Maduro, ta wordo asina hopi neglisha door di esnan cu ta suppose di cuida bo trabao. E hefenan cu suppose di encurasha e trahadonan, ta haya un contratiempo. Mañan ora e bom rementa, e ora nan kier culpa sindicato, nan kier culpa e trahadonan. Pero esaki mester bin di ariba. Nan mester cuminsa motiva hendenan di berdad. No motiva cu palabra so, pero cu hechos.