Na aña 2003, den cuadro di celebracion di 100 aña di misa y 140 aña di e parokia, un grupo di Santacrucero, bou guia di Sr. Rudy Croes, e tempo ey, minister di Husticia, a sinti e necesidad di bin cu’n regaldo den forma di un bandera pa e pueblo di Sta. Cruz.
Sra. Dora Koolman, di Comision di Parokia di Sta. Cruz a sigui bisa cu despues di hopi estudio, e bandera a bira un realidad. Dia 30 di april 2003, den oranan di merdia tabata tin un ceremonia chikito di inauguracion ariba e plenchi pariba di misa.
Presente na e ocasión aki, gobernador di Aruba, minister presidente, minister di Husticia mes, Sr. Rudy Croes, presidente di Staten, pastoornan, Bouwman, Fransen, Toti, e parlamentario tur tabata presente y pastoor Reynaldo a bendiciona e bandera aki. E bandera aki ta e bandera bendiciona.
Sra. Koolman a sigui bisa cu asina ey, Sta. Cruz a ricibi su bandera. Mirando e momento cu e bandera ta subi bay laira, Sra. Koolman a haya e inspiracion pa duna e bandera e siguiente nificacion:
“E isla Aruba, di colo blauw ta simbolisa Mama Maria, patrona di e Parokia. Un parokia ta curason di un districto. Un districto sin su parokia. Casi por bisa cu no ta nada. E blauw ta nifica tambe e colo di e Bisdom di Willemstad. Mei mei di e isla, un cruz ta resalta. E colo geel y na banda e colo cora, parti ariba di e cruz, nos por mira un strea di cuater punto. Aki e colo geel ta simbolisa e spiritualidad di e habitantenan. E amanecer di un comienso nobo, mientras cu e colo cora ta indica e laso di amistad. E cruz ta simbolisa Cristo mes, kende ta centro di nos bida. E strea ta ilumina nos caminda na e momentonan di scuridad. E ta un invitacion pa sigui Cristo. E caminda di Berdad y Bida. E fondo di e bandera ta blanco, color di curason puro di tur e yiunan di Dios. E cruz simbolo di Cristianismo lo sigui ta pa semper e orguyo di e pueblo di Sta. Cruz.”
Esey ta e nificacion di e bandera aki cu desde e tempo ey, 2003 nos tin cu uz’e pa actividadnan. Hopi biaha ta uz’e ora di Himno y Bandera, dia 18 di maart, unda e ta bula hunto cu e bandera di Aruba.