Dia 12 di November a tuma lugar na e ciudad di Matsue (Hapon), e di 24 edicion di JANO, un reunion anual organisa pa e Japan Non-Extraction Orthodontic Academy. Como invitado special e aña aki nan a conta cu e presencia di Dr. Abdal Kawaiah, kende tin su mesun praktijk na Aruba for di 2016.
E topico cu a ser presenta pa Dr. Kawaiah tabata titula “Orthopedic Corrections of Facial Deformities & Airway” cu a ser presenta na Aruba na luna di Juni y na luna di September. Durante su introduccion na e presentacion Dr. Kawaiah a bisa cu ‘Aruba is in the center of the world’ y a mustra nan den e mapa unda nos dushi isla ta ubica, mientras nos bandera a zwaai den su man.
Semper ta un motivo di orguyo di por mira e bandera di Aruba den un evento internacional y den e caso aki ainda mas, pasobra durante e conferencia anual aki a ser presenta diferente casonan local documenta, unda cu e problemanan cronico respiratorio manera SLEEP APNEA y RONCAMENTO por wordo reduci y hasta cura.
Esaki ta un primicia den mundo di medicina na nivel mundial y ta pone nos isla den un lugar privilegia, ya cu Aruba ta un di 4 paisnan na mundo unda cu e tratamento novedoso aki por ser tuma. E tratamento aki ta disponibel exclusivamente na Dr. Kawaiah su praktijk y ta algo cu ta habri e posibilidad pa turismo medico y di studio, ya cu hopi especialista a mustra interes pa bin tuma curso na Aruba.
Durante e clausura di e evento, Dr. Kawaiah a haya un reconocemento special di man di Dr Kiichirou Hata, director di e Japan Non-Extraction Orthodontic Academy, pa su presentacion y su contribucionnan novedoso den mundo di medicina.