CARACAS, Venezuela – E canciyer di Venezuela, Delcy Rodriguez, a denuncia diahuebs e atake di bandanan arma contra un hospital materno infantil, unda cu tabata tin 54 mucha interna. E funcionario a sigura cu e Presidente Nicolas Maduro “a duna instruccion di evacua e hospital pa resguarda mucha y reciennan naci.”
Aunke Rodriguez no a precisa na cual hospital e tabata referi, riba rednan social a denuncia un atake riba e Hospital materno Infantil Hugo Chavez den El Valle, west di Caracas, unda cu disturbionan tabata mas fuerte durante anochi.
Sin embargo, e diputado opositor Jose Manuel Olivares a señala cu e muchanan di e hospital di El Valle, a wordo evacua door di tabata “hopi afecta pa e bomnan lagrimogeno cu a wordo lansa pa GNB (Guardia Nacional Bolivariana) pa controla e disturbionan.
Bisiñanan di e zona a denuncia riba rednan social cu por a scucha tiro y cu camionnan antimotin a disperca protestanan chikito contra Maduro, algo cu e lider opositor Henrique Capriles a rechasa. “E dictadura a ordena su hendenan represion na nos pueblo di El Valle na Caracas. Loke ta keda, asina tur ta haci prome cu sali,” e dirigente a expresa riba su cuenta di Twitter.
E disturbio y intentonan di sakeo a keda registra den zonanan west di e ciudad, manera El Valle, Coche y El Paraiso; di oost, manera La Urbina y zuidoost, manera Santa Fe, La Trinidad y Baruta.
Periodistanan di AFP por a comproba cu na Santa Fe y La Trinidad tabata tin blokeonan parcial di caya y protestanan chikito. Dirigentenan opositor tambe a denuncia cu colectivonan – gruponan Chavista cu segun oposicion ta arma – a ataca bisiñanan di e zona west, unda cu tabata protesta contra e Gobierno.
“Grave situacion na west di Caracas. Solidaridad cu tur esnan cu tabata wordo ataca pa colectivonan paramilitar. Maduro ta caso,” e vice presidente di Parlamento, di mayoria opositora, Freddy Guevara, a skirbi riba su cuenta di Twitter.
E anochi di diaranson tambe tabata tin disturbio y sakeo den El Paraiso. Tur esaki pa motibo di e protestanan opositor contra Maduro pa exigi eleccion y respeto na e Legislativo, cualnan a cuminsa dia 1 di April. Te awor aki, e manifestacionnan a laga ocho morto y cientor di herido y detenido.
Fuente: El Espectador.