Diahuebs ultimo, e cinco banconan commercial, esta Aruba Bank N.V., Banco di Caribe Aruba N.V., Caribbean Mercantile Bank N.V., FirstCaribbean International Bank (Cayman) Ltd. – Aruba branch y RBC Royal Bank (Aruba) N.V., a firma un Memorandum of Understanding (MoU) cu Banco Central di Aruba (BCA) pa traha hunto riba e proyecto di e sistema di pago instantaneo cu lo lansa januari 2019.
Dos siman pasa BCA a tuma un otro paso esencial pa realisa e proyecto importante aki ora a firma e contracto cu equensWorldline, e lider Europeo den e industria di pago y servicio di transaccion. E plataforma nobo aki lo reemplasa e sistema actual di “clearing & settlement” di BCA, cual lo tin e funcionalidad pa procesa tur transaccion entre cuentanan bancario local na un forma instantaneo, esta 24 ora pa dia, tur dia, y full aña.
Awor cu a firma e MoU, e banconan lo traha hunto cu BCA pa ehecuta e proyecto importante aki den e periodo planea. E plataforma nobo aki lo brinda Aruba un sistema di pago moderno y un base solido pa por sigui innova y trece solucionnan nobo.
Mas informacion tocante Banco Central di Aruba ta disponibel riba e website di BCA: www.cbaruba.org