Banconan Britanico lo blokia cuentanan di inmigrantenan ilegal na Januari
LONDON, Gran Britania- Entrante Januari proximo, banconan Britanico lo controla periodicamente e cuentanan di nan clientenan y lo por cera of blokia cuenta di inmigrantenan ilegal, segun The Guardian.
Relaciona cu e Ley di Inmigracion di 2016, banconan lo ta obliga desde 2018 pa haci control pa crea loke gobierno a yama un “ambiente hostil”, cu lo desanima esunnan cu kier keda na Gran Britania, cu tin visa caduca, personanan cu nan asilo a wordo nenga y criminalnan stranhero cu ta pendiente di nan deportacion.
Banconan lo comproba 70 miyon cuenta y status di nan clientenan basa ariba un base di datonan suministra pa e minister di Interior, unda cu ta aparece detayenan di personanan cu ta wordo sospecha di ta den un situacion ilegal pa motibonan anteriormente menciona.
Un vocero di gobierno a bisa cu e controlnan bancario, aproba pa Parlamento na 2016, ta forma parti di e plan di gobierno pa “combati inmigracion ilegal” y el a sigura cu e demas ciudadanonan “lo no wordo afecta”.
Director di e Conseho pa Bienestar di Inmigrantenan, Satbir Singh, a declara na e corant cu “inmigrantenan y minorianan etnico cu pleno derecho di biba akinan lo wordo afecta pa e controlnan aki”.
Como parti di e strategia gubernamental, lo duna boet na esunnan cu ta huur cas cu inmigrantenan ilegal y tambe esun cu ta duna un ilegal trabao.
Fuente: https://www.theguardian.com