Despues di un fin di siman excitante na Piscina Olympico Roly Bisslik na Savaneta, Banco di Caribe ta felicita tur hoben cu a demostra perseverancia y excelencia den natacion. For di diabierna te cu diadomingo a tuma lugar e Aruba Dolphins Invitational Swimming Competition cu Aruba Dolphins ta organisando pa 20 aňa caba. Banco di Caribe tin hopi aña ta patrocinando e competencia, y e aña aki no tabata un excepcion.
Aruba Dolphins a wordo funda na aña 1975. E club di natacion ta dedica na yuda promove e deporte di natacion na Aruba y a bin ta haci esaki structuralmente pero mas importante ainda, cu hopi consistencia. Piscina Olympico Roly Bisslik na Savaneta tabata escenario pa 105 atleta di Aruba Dolphins cu a participa hunto cu varios otro clubnan representando Aruba, Boneiro, Corsou y Canada. Den fin di siman ultimo tabata tin mas cu 225 participante y nan famia cu a bin hunto. Esaki ta e competencia di natacion di mas grandi na Aruba.
Banco di Caribe ta orguyoso di forma parti di e competencia internacional aki, ofreciendo e hobennan un plataforma unico! Riba e imagennan por tuma nota di algun ganador hunto cu Sra. Sue-lan Liao Jen Marketing Officer di Banco di Caribe. Gerencia di Banco di Caribe ta masha contento di por a patrocina un evento asina importante y lo sigui compromete na deporte local y particularmente nos hobennan. Masha Pabien!