Un suplica ta bay na tur cliente cu ta na altura cu Banco no tin su informacion actualisa, pa nan mes yega Banco di Caribe y trece e documento cu falta, sea ta un papel di censo, cambio di adres, cambio di nomber etc. Alabes, nos ta gradici nos clientenan pa nan cooperacion y confiansa pa hunto nos por sigui mantene e nivel y nomber di nos sector financiero na halto.
Desde introduccion di e ley contra labamento di placa y financiamento di terorismo na aña 2011, banconan comercial mester a tuma e medidanan rekeri pa cumpli cu e ley aki cabalmente. Un factor importante di e ley aki ta pa conoce bo clientenan bon y asina evita cu personanan envolvi den actividadnan ilicito ta uza nos institutonan pa ‘laba’ placanan cu nan a gana cu actividadnan ilicito.
Na momento cu e ley a keda activa tur banco y tambe otro proveedornan di servicio cu ta cay bou supervision di Banco Central, mester a completa file di tur cliente cu e informacionnan rekeri. Periodicamente mester revisa e filenan y si tin cambio den e informacion di e cliente nan, mester bolbe pidi informacion actualisa. Cada instituto bancario tin su mes rekisitonan segun cu nan ta cuadra den nan organisacion, semper y cuando cu nan ta cumpli cabalmente cu ley. Door di keda mantene un file incompleto Banco ta core riesgo di haya un multa pa incumplimento cu e ley ariba menciona. Si banconan y otro institucionnan cu ta cay bou di e ley no cumpli cu e ley, esaki ta forma un menasa serio pa e integridad di e sector financiero di e pais.
Banco di Caribe (Aruba) N.V. no ta un excepcion den e cuadro aki y nos mester haci tur esfuerso pa cumpli cu e ley. For di aña 2012 nos a bin ta manda carta, recordatorio y tambe yama nos clientenan telefonicamente pa nos por mantene nan file completo y keda cumpli cu e ley y reglanan di pais Aruba. Mayoria di nos clientenan a cumpli cu nan parti pa cual nos ta hopi agradecido pa nan cooperacion. Pero tin un parti chikito cual a haña diferente carta pero cu pa un of otro motibo ainda no a logra completa nan informacion den nan file. Pa regla nos mester termina un relacion cu un cliente cu ta den incumplimento. Sinembargo, nos a scohe pa duna e cliente cu no a cumpli ainda na nos peticion, un ultimo oportunidad pa ainda trece e informacion cu nos falta. E manera cu nos ta haci esey ta di pone un alerta den nos systema cu na momento cu e cliente ey kier haci un transaccion, esey lo no ta posibel sin cu e entrega nos e informacion cu falta den su file.