Durante e reunion di dia 20 di december 2018, e Comite di Maneho Monetario (CMM)2 di Banco Central di Aruba (BCA) a dicidi pa mantene e porcentahe actual di e tasa di e “reserve requirement” na 11,0 porciento y e “advance rate” na 1 porciento, despues di a evalua e datonan economico y monetario mas recien. E siguiente informacion y analisis a wordo considera pa yega na e decision aki, basa riba data di october 2018.
Reservanan internacional
E reservanan internacional (incluyendo e diferencia di revaluacion) di divisa total a nota un caida di Afl. 28,0 miyon den october 2018, cual ta e segundo contraccion registra consecutivamente. Compara cu december 2017, e nivel di reservanan internacional di divisa a baha cu Afl. 14,6 miyon (−0,9 porciento), aunke e reservanan oficial a registra un aumento di Afl. 9,2 miyon (+0,6 porciento). Consecuentemente, e reservanan internacional y e reservanan oficial a yega te na , respectivamente, Afl. 1.809,6 miyon y Afl. 1.658,4 miyon na fin di october 2018.
Desaroyonan den credito
E crecemento di credito total dentro di e sector di banconan comercial a crece cu +2,4 porciento den october 2018, compara cu december 2017. E desaroyo aki ta principalmente atribui na aumentonan den fiansa pa construccion di cas (+6,5 porciento) y na empresa (+1,7 porciento). Un caida di 9,5 porciento a wordo registra pa prestamonan personal, cual ta un componente di credito na consumidornan.
Inflacion
E indice di CPI a crece cu 4,2 porciento den oktober 2018, compara cu e luna corespondiente di e aña anterior. Esaki a wordo principalmente causa door di un tasa mas halto di BBO desde 1 di juli 2018 y door di un aumento den e componentenan di transporte y cuminda. E promedio di inflacion a yega te na 2,7 porciento na october 2018. E promedio di inflacion ora exclui e componentenan di energia y cuminda a yega na 1,4 porciento na october 2018.
Turismo
Durante e prome dies lunanan di 2018, e desaroyo den e indicadornan di turismo a registra crecemento, ya cu a nota un expansion den e cantidad di bishitantenan (+1,3 porciento), anochinan permaneci (+1,4 porciento), cantidad di turistanan crucero (+5,8 porciento) y entrada relata na turismo registra na banconan comercial (+9,7 porciento).
Placa den circulacion
E cantidad di placa den circulacion a registra un subida di Afl. 83,3 miyon te na Afl 4.323,2 miyon den oktober 2018, compara cu december 2017. Esaki ta debi na un aumento den e activo domestico netto (+Afl. 71,8 miyon) y den e reserva di divisa netto (+Afl. 11,5 miyon, excluyendo e diferencia di revaluacion).