BCA ta e unico autoridad di supervision di e sector financiero na Aruba. Den e rapport aki, cu ta legalmente obligatorio, BCA ta duna un bista di su actividadnan principal ehecuta y decisionnan mas importante tuma riba e tereno di maneho den e implementacion di e ordenansanan di supervision durante 2017, incluyendo e leynan pa preveni y combati labamento di placa y financiamento di terorismo. E rapport aki tambe ta describi e accionnan tuma pa sigui reforsa e marco legislativo y regulatorio. Tambe, tin un resumen di e desaroyonan reciente den e architectura internacional di supervision, como tambe un analisis di e desaroyonan principal den e sector financiero domestico.
Manera cu e tabata den e añanan anterior, e nucleo di BCA su actividadnan di supervision den 2017 a consisti di inspeccionnan periodicamente haci na e institucionnan bou supervision mes pa asina evalua e riesgonan mas grandi y e cumplimento cu e ley- y regulacionnan vigente, como tambe e vigilancia riba distancia (e asina yama “off-site surveillance”). E ultimo menciona ta inclui analisis di e rapportnan financiero cu e institucionnan bou supervision ta entrega periodicamente na BCA y e reunionnan bilateral teni cu e institucionnan bou supervision aki. Ora cu ta considera necesario, BCA ta aplica su instrumentonan di supervision pa enforsa cumplimento cu e ley- y regulacionnan di supervision. Ta tuma pasonan formal den casonan unda cu BCA ta identifica situacionnan di incumplimento cu e ley- y regulacionnan di supervision. E decision pa aplica e pasonan formal ta depende, entre otro, di e gravedad di e caso. Na 2017, a tuma diesdos (12) paso formal: den nuebe (9) caso a impone multanan administrativo y na tres (3) caso a emiti instruccion formal (“directive”) pa asina remedia e deficiencianan cu a registra.
BCA ta implementa un enfoke basa riba riesgo, unda cu ta aloca e parti mas grandi di su recursonan di supervision na e institucionnan cu e perfil mas halto di riesgo (basa riba BCA su mesun evaluacion di riesgo). E enfoke aki, hunto cu BCA su maneho estricto di enforsa y su compromiso continuo pa cumpli cu e normanan mas halto y e mihor practica den e area di regulacion y supervision di e sector financiero, a bin ta instrumental den e mantencion di e solides y reputacion di e sector financiero di Aruba.
E rapport di supervision di e sector financiero ta indica tambe cu durante 2017 e sector financiero domestico a keda solido, lucrativo, y sumamente resistente na shocknan externo. E tasanan prudencial agrega di e sectornan bou supervision a keda den e margennan adecua. E tasa di prestamonan den un situacion di incumplimento (e asina yama “nonperforming loans ratio”) di e banconan comercial a keda den margennan acceptabel, sumando na 4,0 porciento na final di 2017. Ademas, e “stress tests” haci riba e sector bancario domestico a demostra cu e asina yama “risk-weighted capital ratio” y “prudential liquidity ratio”, cualnan tabata 30,7 porciento y 28,6 porciento, respectivamente, na final di 2017, ta mas cu adecua pa por absorba shocknan externo significante.
Cu e bista pa sigui enforsa e marco di e prevencion y combatimento di labamento di placa y financiamento di terorismo como tambe pa prepara pa e proximo evaluacion di e Caribbean Action Task Force (CFATF) na 2020, BCA a haci un evaluacion propio basa riba e recomendacionnan di FATF di 2012 cualnan ta cay dentro di BCA su dominio pa asina identifica cualkier deficiencia cu por tin y pa asina traha riba un plan di accion pa por drecha e deficiencianan identifica. E ehercisio aki a revela cu tin un par di deficiencia cu lo mester wordo coregi, parcialmente door di enforsa y amplia e ordenansa estatal di prevencion y combatimento di labamento di placa y financiamento di terorismo como tambe e ley- y regulacionnan relaciona cu esaki.
E ampliacion di e red di supervision tambe a continua den 2017 cu e introduccion di e ordenansa di supervision di e mercado di balornan (e asina yama “Landsverordening toezicht effectenverkeer”) como tambe e cambio den e ordenansa di supervision di e companianan di transferencia (e asina yama “Money Transfer Companies”), unda cu a extende e alcance di esaki te na e oficinanan di cambio di divisa. Tambe, tin otro proposicionnan legislativo den mira cu tambe lo expande e mandato di supervision di BCA den e area di e conducta di e mercado, incluyendo, pero no ta limita na, un proposicion legislativo cu lo regula credito na consumidor y un propuesta pa introduci un garantia di deposito ( e asina yama “deposit insurance scheme”).
Den 2017, manera den e añanan anterior, BCA lo continua cu su esfuersonan pa sigui enforsa e marco regulatorio door di emiti guianan nobo of revisa e guianan existente. Akibou ta duna un bista en corto di e cambionan mas importante haci den 2017 of cu a inicia den 2017 den cuadro di e marco regulatorio.
1. Aumento di e rekisito minimo di solvencia pa institucionnan di credito
Entrante prome di januari 2017, BCA a aumenta e rekisito minimo di solvencia (e asina yama “minimum solvency requirement”) pa banconan di 14 porciento pa 16 porciento. E aumento aki ta wordo considera necesario den luz cu Aruba su economia unilateral, como tambe e normanan yama “Basel III” cu a wordo emiti pa e “Basel Committee on Banking Supervision” cu ta exigi rekisitonan mas halto di capital y likides pa e banconan.
2. Aumento di e taza minimo di e asina yama ‘prudential liquidity ratio’ pa institucionnan di credito
Den cuadro di e normanan di Basel III, BCA a tuma e decision pa aumenta gradualmente e taza minimo di e asina yama ‘prudential liquidity ratio’ for di 15 porciento te na 20 porciento durante un periodo di tres (3) aña, cuminsando desde prome di januari 2018.
3. Publicacion di e documento di maneho riba e Maneho di Riesgo di Tecnologia pa Institucionnan di Credito
Na december 2017, BCA a emiti na e institucionnan di credito, pa consulta cu nan, un concepto di e documento di maneho tocante e maneho di riesgo di tecnologia pa institucionnan di credito. E documento di maneho aki ta presenta e principionan di maneho di riesgo como tambe e mihor practica den maneho di riesgonan tecnologico. E version final di e documento di maneho a wordo publica na maart 2018 y a drenta na vigor dia prome di juli 2018, cu un periodo di transicion di diesdos (12) luna pa por cumpli cu e guia di maneho aki.
4. Emision di e documento di maneho intersectoral tocante maneho di riesgo di contractonan di servicio cu tercera
Na juli 2017, un concepto di e documento di maneho intersectoral tocante maneho di riesgo di contractonan di servicio cu tercera (“cross-sectoral policy paper on Risk Management for Outsourcing Arrangements”) a wordo distribui pa consultacion. E concepto di e documento di maneho aki ta contene un lista di normanan di practica y maneho di contractonan di servicio cu tercera. E alcance y grado cu un institucion ta implementa e normanan aki lo mester ta den liña cu e indole di e riesgo y e materialidad di e servicio cu tercera. E version final di e documento di maneho a wordo publica na maart 2018 y a drenta na vigor dia prome di juli 2018, cu un periodo di transicion di diesdos (12) luna pa por cumpli cu e guia di maneho aki.
Pa conclui, e enforsamento estricto y consistente di e ley- y regulacionnan di supervision y di e prevencion y combatimento di labamento di placa y financiamento di terorismo den e transcurso di e ultimo añanan, a contribui na mantene un sistema financiero stabiel, cu bon reputacion y sano na Aruba. Tambe, a haci hopi na reenforsa e marco di supervision di e sector financiero, cu e bista pa mantene, riba un forma continuo, e normanan internacional den e area di supervicion di e sector financiero.
E FINANCIAL SECTOR SUPERVISION REPORT 2017 ta disponibel for di awe riba e website di BCA www.cbaruba.org.