Banco Central: Reserva di Divisa a subi

0
RBC Juli 2018
Funmiles-2018

Desaroyo monetario
Den e luna di December 2017, e cantidad di placa den circulacion a subi cu Afl. 88,7 miyon te na Afl. 4.239,9 miyon, compara cu November 2017. Esaki a resulta for di crecemento den tanto e reserva di divisa netto como e activo domestico netto, di respectivamente Afl. 71,4 miyon y Afl. 17,3 miyon.

E subida den e reserva di divisa netto di e sector bancario a resulta for di compra netto di divisa for di publico (+Afl. 252,6 miyon), primordialmente relaciona cu entrada for di turismo, transferencia netto for di cuentanan den exterior di companianan local, otro inversion, servicio di transportacion y inversion directo. Esaki a wordo pa un gran parti mitiga cu benta netto di divisa na publico (-Afl. 181,3 miyon) principalmente relaciona cu importacion di mercancia, otro servicionan, transferencia coriente y e asina yama “income accounts”.

E expansion den e activo domestico netto ta debi na un aumento den transaccionnan no relata na credito (+Afl. 39,5 miyon), cual a wordo pa un gran parti mitiga pa un bahada den credito domestico (-Afl. 22,2 miyon). E subida den transaccionnan no relata na credito ta mas tanto relaciona cu un caida den otro debenan y transaccionnan di clearing. Credito domestico a disminui door di menos credito bancario netto na e sector publico (-Afl. 25,2 miyon), mientras cu credito bancario na e sector priva a subi (+Afl. 3,0 miyon)

E bahada den credito bancario netto na e sector publico ta debi principalmente na un aumento den depositonan di gobierno (+Afl. 32,6 miyon). E subida den credito bancario na e sector priva ta debi na mas hipoteca pa vivienda (+Afl. 5,8 miyon) y credito na empresa (+Afl. 3,3 miyon). Di otro banda, credito na consumidor a nota un bahada di Afl. 6,1 miyon.

Inflacion
E nivel general di prijs, cu ta wordo midi door di e indice di prijs di consumo, a registra un bahada di 0,3 porciento den e luna di December 2017, compara cu December 2016. E contribuyente principal na e caida aki ta e componente “Vivienda”, cual ta debi primordialmente na un reduccion den prijs di electricidad. Otro componentenan cu tambe a registra bahada ta e componentenan “Recreacion y Cultura”, “Mobilario” y “Paña y Sapato”. Di otro banda, e componentenan “Transporte” y “Restaurant y Hotel” a registra subida. Si exclui e componentenan di cuminda y energia for di e indice di prijs di consumo, inflacion a mustra un aumento di 0,2 porciento compara cu December 2016. Pa loke ta trata e promedio anual di e tasa di inflacion, esaki a keda mescos, esta un bahda di 0,5 porciento na December 2017, compara cu November 2017.

Turismo
Na December 2017, e cantidad di turista a registra 105.544 bishitante, cual ta 8.502 bishitante (+8,8 porciento) mas cu na December 2016. E crecemento aki a resulta principalmente door di un expansion den e mercado Norte Americano di 10.228 bishitante (+16,6 porciento), cual a wordo parcialmente mitiga pa un reduccion den e mercado Latino Americano di 2.000 bishitante (-8,1 porciento).

E subida den e mercado Norte Americano a resulta principalmente door di mas bishitante for di Merca (+9.302 bishitante of +16,7 porciento). E caida den e mercado Latino Americano a wordo causa primordialmente pa menos bishitante for di Venezuela (-3.506 bishitante of -22,9 porciento), parcialmente mitiga pa subidanan den bishitante for di Colombia (+742 bishitante of +18,2 porciento), Argentina (+534 bishitante of +40,8 porciento) y Brazil (+411 bishitante of +29,5 porciento).

E cantidad di turista crucero a registra un bahda di 1.867 bishitante of 1,9 porciento te na 98.775 bishitante na December 2017, compara cu December 2016. E cantidad di barconan a expande for di 47 na December 2016 pa 51 na December 2017.

Entrada di Gobierno
Na December 2017, entrada di gobierno a suma Afl. 143,1 miyon, cual ta Afl. 7,7 miyon mas compara cu e mesun luna di e aña anterior. Esaki a resulta for di un aumento den entrada di impuesto (+Afl. 39,6 miyon), cual a wordo pa un gran parti mitiga pa un bahada den entrada no relata na impuesto (-Afl. 31,9 miyon).
E subida den entrada di impuesto ta relata principalmente na mas impuesto riba ganashi (+Afl. 34,0 miyon), impuesto riba propiedad (+Afl. 4,2 miyon), e asina yama “overdrachtsbelasting” (+Afl. 2,7 miyon), impuesto riba entrada (+Afl. 1,9 miyon) y impuesto riba vehiculo di motor (+Afl. 1,1 miyon). E subidanan aki a wordo parcialmente mitiga pa menos impuesto riba salario (-Afl. 4,2 miyon) y impuesto riba importacion (-Afl. 1,5 miyon).

Banco Central di Aruba
22 Februari 2018

Comments

comments

C: Heineken
new india