Banco Central di Aruba a emiti dia 12 di september 2016 un comunicado di prensa encuanto di biyete falso di 100 florin den circulacion. Recientemente a bolbe constata cu tin mas biyete falso di 100 florin den circulacion. E problematica aki tin e debido atencion di Banco Central di Aruba. Ta importante pa e publico sigui ta alerta y pone bon atencion riba e siguiente informacion y e diferencianan entre e biyete legitimo di 100 florin y esunnan falsifica:
Por nota cu tur biyete falsifica di 100 florin haya te awor ta visiblemente falso. E biyetenan falso ta copia riba un papel di calidad inferior y e colornan tambe ta di calidad inferior.
E ultimo biyete falso di 100 florin cu Banco Central di Aruba a risibi, tin como number di serie 0895706322. Mester tene na cuenta cu por tin otro biyetenan di 100 florin falso cu otro number di serie den circulacion.
E biyete falsifica aki no tin e watermerk di electrotype (e dibuho di Watapana/Dividivi) cu ta bira visible den tononan cla y scur den e papel ora tene e biyete contra luz.
E folie di plata ariba e biyete falso no ta mesun lombrante ni visibel manera ta e caso den e biyete legitimo.
E hilo di seguridad na e banda dilanti di e biyete ora bo ten’e contra lus no ta bira visibel manera ta e caso den e biyete legitimo.
Conforme articulo 2:170 di e Codigo Penal di Aruba, hues por dicta entre otro un sentencia di maximo nuebe aña den prizon pa falsificacion di nos biyete di florin.
Foyeto tocante e caracteristicanan di autenticidad di e biyetenan ta obtenibel na Banco Central di Aruba y ariba e website di Banco Central di Aruba (www.cbaruba.org), como tambe na tur banco comercial. Pa mas informacion y peticion pa sesion di informacion por tuma contacto cu departamento di Kas & Kluis di Banco Central di Aruba na telefon 525-2139 / 525-2141.