Despues di un ‘go-live’ exitoso den weekend, den cooperacion estrecho cu e banconan comercial, Banco Central di Aruba (BCA), den su funcion di ‘clearing house’, ta anuncia cu un infrastructura di pago instantaneo nobo awor ta disponibel na Aruba. E solucion di pago instantaneo nobo aki yama I-Pago, e marca pa servicionan di pago instantaneo local. I-Pago ta un paso importante den e modernisacion di e infrastructura di pago di Aruba. Awor por hasi pagonan mes lihe y facil cu placa cash, bahando duracion di transaccion significantemente, reduciendo incertidumbre di pago y di e manera aki promoviendo transparencia.
Historia
Na aña 2016, BCA a invita diferente ‘stakeholder’ pa tende nan punto di bista riba Aruba su infrastructura di pago. Practicamente tur ‘stakeholder’ a expresa nan deseo pa mira mehoracion den e infrastructura di pago, y tabata habri pa modernisacion, automatisacion, y un reduccion den metodonan tradicional di pago. Adicionalmente, BCA a inclui den su plan strategico ‘Bela Yen – Nos Plan Strategico 2016 – 2020’ plannan pa expande BCA su tareanan den e area di pago, pa asina contribui na e modernisacion di e sistema di pago. I-Pago ta awor e prome paso den esaki.
E implementacion di I-Pago ta encera e cambio di e sistema anterior di ‘Clearing and Settlement’ (Onnet) pa un solucion nobo pa procesa transaccionnan bancario instantaneamente. Desde awor, ta procesa pagonan na florin entre banconan na Aruba den un manera instantaneo, 24 ora pa dia, 7 dia pa siman, henter aña. Cu e introduccion di I-Pago, ta eleva Aruba su infrastructura di pago na un nivel di acuerdo cu e miho practicanan internacional existente, mehorando asina su eficiencia, confiabilidad y seguridad.
Caracteristicanan di I-Pago
Transaccionnan instantaneo cu I-Pago tin e siguiente caracteristicanan:
– Transferencianan instantaneo na florin entre cuentanan bancario na diferente banconan local
– Disponibilidad 24/7/365 cu iniciacion via diferente canal
– Procesamento dentro di algun seconde
– Pago final y confirmacion mesora pa pagado y beneficiario
– Acceso mesora na fondonan
Cu e funcionalidadnan aki, I-Pago ta brinda un base amplio pa acomoda desaroyonan nobo den e industria di pago, y ta haci posibel pa e participantenan sigui innova y trece solucionnan di pago nobo pa e comunidad Arubano.
Banconan participando cu I-Pago ta:
– Aruba Bank N.V.
– Banco di Caribe (Aruba) N.V.
– RBC Royal Bank (Aruba) N.V.
– FirstCaribbean International Bank (Cayman) Limited – Aruba Branch
– Caribbean Mercantile Bank N.V.
Na luna di februari proximo, mas informacion di I-Pago lo ta obtenibel riba BCA su website: www.cbaruba.org/Ipago
Tocante Banco Central di Aruba
E proposito principal di Banco Central di Aruba (BCA) ta pa contribui na e stabilidad financiero y bienestar economico di e comunidad Arubano. BCA ta cumpli cu e mission aki pa medio di e implementacion efectivo di maneho monetario cu e meta pa mantene e balor di nos florin, promove e stabilidad y integridad di e sistema financiero y provee un sistema di pago eficiente y confiabel.
Banda di e tareanan principal aki, BCA tambe ta e unico instituto cu ta emiti biyete y moneda di florin, y ta actua como banco di Gobierno di Aruba. Adicionalmente, BCA ta regula e fluho di pagonan internacional, ta maneha e reserva di divisa di Aruba y ta supervisa e uzo di divisa.
Pa mas informacion tocante Banco Central di Aruba, bishita nos website www.cbaruba.org