Banco Central cu Economic Forecast Monitor

OLYMPUS DIGITAL CAMERA

Banco Central di Aruba (BCA) a publica un actualisacion di e asina yama Economic Forecast Monitor (EFM) riba su website. E EFM ta duna un bista riba proyeccionnan economico, ambos internacional y local, door di diferente institucionnan. E actualisacion aki ta inclui proyeccionnan nobo solamente riba e economia internacional. Un resumen di e proyeccionnan internacional ta wordo duna aki abou.
E producto domestico bruto pa Merca den termino real ta proyecta pa crece cu 2,3 porciento na 2016. E crecemento aki ta sosteni pa, entre otro, mehoracion di e posicion financiero di hogarnan Mericano, y un mehoracion den e mercado pa vivienda. Adicionalmente, un crecemento den gasto domestico, impulsa pa aumento den entrada disponibel den termino real y consumo di gobierno, ta premira pa contribui na e resultado pronostica. Crecemento den e Zona Euro (1,6 porciento) ta proyecta pa permanece na un nivel modera na 2016, atribui, entre otro, na debenan halto pa ambos sector publico y sector priva, inversionnan abou, e efecto di envehecimento, y crecemento abou den productividad.
Crecemento economico Latino Americano den su totalidad ta proyecta pa ta negativo. Sinembargo, Chile, Colombia, Mexico y Peru ta proyecta pa logra crecementonan di 2,4 porciento of mas halto. Brasil ta premira pa cay cu 2,6 porciento, mientras cu e economia di Venezuela lo sigui disminui (-7,8 porciento). E crisis politico actual den e dos paisnan aki, entre otro, ta un di e motibonan pa nan caida economico.
Inflacion den economianan avansa ta proyecta pa permanece na nivelnan abou (menos cu 2,0 porciento) na 2016, relata principalmente na e desaroyonan den prijs di crudo na 2015 y 2016. Na paisnan Latino Americano, inflacion ta premira pa fluctua entre 3-5 porciento cu excepcion di Argentina (28 porciento), Brasil (7,9 porciento), y Venezuela (372,5 porciento).
Prijsnan di crudo ta proyecta pa permanece na nivelnan abou na final di 2016; specificamente na US$ 41 pa bari. Actualmente, tin incertidumbre riba e proyecion di prijsnan di crudo ya cu ta desconoci cuanto e inventario di almacenahe global por absorba. Ademas, tin incertidumbre riba e crecemento di demanda global y con productornan di crudo lo tuma un nivel abou sosteni di prijsnan di crudo.
(Fuentenan: “EIA Short-term Energy Outlook and Summer Fuel Outlook” April 2016, “IMF World Economic Outlook” April 2016, “Wells Fargo Monthy Outlook” April 2016).
E publicacion “Economic Forecast Monitor” (EFM) ta disponibel desde awe riba e website di BCA www.cbaruba.org.

Comments

comments