Banco Central: Confiansa di consumidor a recupera den e di dos trimester di 2016

OLYMPUS DIGITAL CAMERA

Confiansa di e consumidor a mehora den e di dos trimester di 2016, yegando su resultado mas halto desde e di dos trimester di 2014. Maske ainda negativo, e Indice di Confiansa di Consumidor a sera na 96,8 pa e dos trimester trimester di 2016, cual ta un mehoracion di 2,3 punto di indice compara cu e di prome trimester di 2016 (mira Grafico 1). E subida aki ta probablemente atribui na e anuncio di e re-apertura di e refineria durante e di dos trimester di 2016. E Indice di Situacion Actual a subi di 93,2 te na 95,3 mientras e Indice di Expectativanan a mehora di 95,1 te na 100,2, yegando un resultado optimista pa prome biaha desde e di cuatro trimester di 2013.
Consumidornan tabata mas optimista riba e futuro cercano den e di dos trimester di 2016. E grupo di consumidornan cu ta spera cu nan condicionnan financiero personal lo mehora a crece di 20,1 porciento te na 37,0 porciento, e porcentahe mas halto desde e di cuatro trimester di 2013. E sentimento aki tambe tabata evidente den, respectivamente, condicionnan di negoshi pa futuro (di 17,3 porciento te na 29,8 porciento) tambe den e posicion financiero di gobierno pa futuro (di 12,5 porciento te na 21,8 porciento). E percepcion di condicionnan laboral di consumidornan pa futuro tambe tabata mas positivo, door cu 17,5 porciento di e respondientenan a indica cu expectativanan pa haña un trabou den futuro lo mehora, e resultado mas halto desde e comienso di e encuesta na 2012.
Un 23,8 porciento di respondientenan (8,5 punto di porcentahe mas halto cu e trimester previo) a indica cu condicionnan financiero personal a bira “miho” cu seis luna pasa. Ademas, 48,3 porciento a indica cu condicionnan di negoshi a deteriora, 1,1 punto di porcentahe mas abou cu e trimester anterior cu respondientenan indicando condicionnan miho subiendo cu 6,2 punto di porcentahe. Tambe, e porcion di consumidornan indicando cu e posicion financiero di gobierno a deteriora a baha cu 6,4 punto di porcentahe te na 48,5 porciento, mientras 11,3 porciento a indica un mehoracion. Adicionalmente, 65,0 porciento di respondientenan a indica cu e expectativanan actual pa empleo a bira mas dificil (menos compara cu 70,4 porciento den e trimester anterior).
E indicenan di expectativa di prijs y custumber di compra di consumidor a mehora marginalmente. E Indice di Expectativanan di Prijs a subi di 90,7 den di prome trimester di 2016 te na 91,0 den e trimester bou repaso. E porcion di consumidornan indicando cu prijsnan tabata mas abou cu seis luna pasa a subi di 2,8 porciento te na 3,5 porciento. Finalmente, e Indice di Habito di Consumo a mehora un poco di 96,0 te na 96,4. Sinembargo, mayoria di consumidornan ta kere cu ainda no tabata apropia pa cumpra un auto (66,5 porciento), aparato grandi (48,5 porciento), haci un prestamo (70,9 porciento) of un hipoteca (75,3 porciento). Mas cu mitar di respondientenan (51,0 porciento) a bisa cu ta apropia pa bai riba vakantie.
Resumiendo, e subida den confiansa di consumidor pa gran parti a wordo atribui, na un subida den e condicionnan actual y e percepcion di futuro cercano di consumidornan, cu e ultimo yegando un nivel optimista. Tambe tabata tin un mehoracion leve den nan percepcion riba nan habito di consumo contribuyendo na confiansa di consumidor.
Por obtene e resultadonan completo di e encuesta aki for di e website di BCA. Pa mas informacion por tuma contacto cu Sr. Jonathan Upegui, Economista di e Departamento di Research, na [email protected]

Comments

comments