Banco Central Aruba cu encuesta di corupcion na Aruba

Desde 8 di november 2019, Banco Central di Aruba (BCA) ta ehecutando bao di nos comunidad e “Encuesta di Corupcion” pa evalua e nivel percibi di corupcion na Aruba. BCA kier informa e publico cu e encuesta aki ta wordo prolonga te cu 5 december proximo.
E meta di e encuesta aki ta pa BCA adkiri informacion valioso tocante e experiencia y percepcion di nos ciudadanonan pa cu e nivel di corupcion y tambe riba posibel accionnan corectivo y/of medidanan efectivo pa combati e fenomeno aki. Den e encuesta aki, corupcion ta wordo defini como abuso di poder pa beneficio propio. E encuesta ta inclui, entre otro, preguntanan relata na e nivel di corupcion, e experiencia cu corupcion na momento di haci uzo di servicionan particularmente den e sector publico, e experiencia ora di raporta corupcion, y e necesidad pa medidanan adicional pa combati corupcion.
Pa yuda BCA colecta e datonan importante aki, un grupo di encuestador ta bishita diferente hogar y haci e entrevistanan den nomber di BCA. E encuestadornan aki tin un carnet cu e logo di BCA pa identifica nan mes. Nan tur tin e obligacion pa tene tur informacion cu nan ricibi estrictamente confidencial.
BCA ta consciente cu gran parti di e informacion aki ta sensitivo y pa e motibo aki ta enfatisa cu e encuesta ta totalmente anonimo y ta garantisa cu lo trata tur informacion obteni confidencialmente y uze solamente riba un base agrega pa metanan estadistico y analitico na BCA. BCA ta spera cu tur personanan aserca door di e encuestadornan aki pa participa den e encuesta aki lo duna nan maximo cooperacion. Si tin cualkier pregunta riba e topico aki, por tuma contacto libremente cu sra. Ghislaine Paalman, na tel. 5252100 o via e- mail: [email protected]

Comments

comments