Den siman tabatin e di dos (2) rueda di prensa convoca p’e comision organizador di e Parokia di Dakota (Misa Birgen di Fatima). Cu masha alegria y satisfecho e grupo organisador cu a ilustra cu tur cos ta bayendo den un bon direccion p’e fecha diadomingo 2 Juli.
Nan ta masha gradici mes cu tur colaboracion ricibi, cu a bin di tur tipo di instancia. E grupo grandi di voluntario ta contento cu e reaccion brinda dor di nos propio artistanan local, koki y chefnan di diferente pais cu lo expone nan plato.
“Na momento cu nos a hinca e proyecto aki den otro, nos a spera reaccion. Pero no di e forma masivo aki….Nos ta masha gradecido”, esaki tabata e palabranan di e relacionista publico di e comision organisador “Fatima ta di nos dos” esta Shon Pe Krozendijk.
Tur siman ta reuni p’asina wak con tur cos ta desaroyando cu e proceso di e Proyecto grandi aki. Manera a ser menciona, pa mas di 3 aña e comision a bin ta organisa un sin fin di actividad y eventonan pa logra recolecta e suma di placa cu ta uno basta halto p’e reconstruccion.
Tur esaki debi cu e Misa ta den un situacion basta delicado manera el a ser ilustra, aunke na prome bista bo ta wak cu e structura ta ok. Pero ora bo detaya su diferente aspecto mester señala cu e infrastructura di Misa ta den un estado basta delicado.
E infrastructura di e Misa ta basta deteriora, e dak ni di papia mes cu ta den un situacion extremadamente penoso.
Mientras cu e comision organizador di e Radio-Telethon cu ta traha di forma voluntario, a bin ta traha den blok p’asina presenta un diadomingo espectacular dilanti di CB Dakota for di 10’or di mainta te cu 6’or di atardi un festival di cuminda multicultural unda cu por ehempel bo por saborea plato nan di Italia, Filipinas, Colombia, Venezuela, Aruba, Republica Dominicana, Boneiro y Aruba.
E parti special di e festival culinario aki ta, cu lo tin desayuno pa esnan cu kier purba e delicianan aki como tambe lo tin e plato fuerte. For di un bon sopi, pa un lasagna te na loke bo ta desea di purba na un prijs super special.
Pa mucha lo tin un sin fin di atraccionnan pa nan pasa bon, por ehempel hotdog, pop corn, cotton candy y yen di sorpresa. DJ Rwin y Xavi D lo trece bon ambiente for di tempran. Pa loke t’e lista di artistanan cu ta aporta cu nan talento mester menciona Nelson Sprock cu su Caha di orgel, Araguaney (Cuarto, arpa y maraca), E legendario Etty Toppenberg, E grupo Amigonan di Hesus y Maria, e popular K2K Dance Group, e contagioso Papito y su Biba Lekker Band, e talentoso Jursey Sophia, e bochincha di ambiente di Rincon Boyz, e sensacional Tsunami, e banda nobo Mellow, el maestro Robert Jeand’or y su Solo Banda Show.
E comision “Renobacion” ta consisti di Shon Pe Krozendijk, Vanessa Croes-Croes, Dina Arends, Elda de Cuba, Daniel Aquirre, Martica Franken, Olga Marin,
Moises Fernandez, Marjolein Tromp, sigui pa Elva Angela, Indira Abath, Judeska Winklaar, Evelien Steba y Melvin Garcia, tur di nan di forma volunario ta trahando p’e bon causa’ki.
“Nos ta spera hopi hende bin haci nan contribucion maske ta un (1) florin, ya cu cada florin ta conta”, esaki ta loke Shon Pe tambe a señala. Rev. Pastoor Daniel Szpila hunto cu e comision ta satisfecho cu tur preparativo pa diadomingo 2 Juli dilanti di CB Dakota ta uno exitoso.
Sin duda algun mester gradici tur esnan cu ya caba a haci nan donacion, esnan cu a haci un transferencia coperando, aportando, contribuyendo y yudando pa por caba di sera e placa cu tin mester pa e reconstruccion.
Lo unico cu falta p’e comunidad completo di Aruba haci nan contribucion si ta cash, si ta cu bo ATM card ya cu lo tin fasilidad p’abo ‘swipe’ e cantidad cu bo ta desea di yuda cune p’asina restaura e Misa den su totalidad. Tambe por deposita e contribucion na un di nos cuentanan bancario di CMB 64017607 Teleton Misa Birgen di Fatima of Aruba Bank 2616870190 Telethon 2017 Parokia Birgen di Fatima. Corda cu “Fatima ta di nos dos”…