Por medio di un iniciativa di Minister di Labor drs. Paul Croes, na 2014 a inicia cu e proyecto yama BAN TRAHA. E meta principal tras di e proyecto aki ta pa logra reintegra personanan cu ta den bijstand, personanan cu kier traha y cu por traha, un biaha mas riba mercado laboral. Un proyecto cu ta dunando sumamente bon resultado caminda por conta cu casi 500 persona cu un biaha mas ta forma parti di e mercado laboral y ta significa alrededor di 500 persona menos riba bijstand. Pa ta exacto, na aña 2014 e cifra di personanan riba bijstand tabata 2912 persona. Awendia, cu introduccion di e proyecto BAN TRAHA bou encargo di Minister Croes por conta 2482 persona riba bijstand. E personanan cu awor a keda re-integra den nos mercado laboral, por conta awor riba un salario mas halto, un stabilidad financiero pa nan y nan famia, por gosa di un mihor bida social, y ta contribui mas na desaroyo economico di nos pais. Pa loke ta trata presupesto, esaki ta trece un desaroyo significativo dilanti como cu e personanan cu awor ta laborando ta traduci den un gasto di alrededor di 4 miyon florin menos. Bisando esaki por observa cu re-integrando personanan riba bijstand ta trece cambionan positivo cune no solamente pa e persona en cuestion, pero tambe pa pais Aruba. Pa e rason aki , ta keda stimula un y tur cu kier y por traha, pa haci esaki y asina por brinda nan famia un miho calidad di bida. Mientrastanto, BAN TRAHA lo continua y ta pone enfasis pa purba re-integra mas tanto persona posibel, bek riba mercado laboral.