Ban Serio Aruba ta presenta su ganador di e campaña ‘Pimp my Cup’

Durante temporada di Carnaval, Ban Serio! a lansa e campaña di ‘Pimp my Cup’ unda cu tur persona por a decora un cup duradero/reuzabel na su gusto y manda esaki pa e Facebook page di Ban Serio Aruba pa asina participa den e ‘challenge’ aki. E cup cu mas ‘likes’ riba e Facebook page di Ban Serio Aruba a gana un pakete pa asina por disfruta di carnaval den un forma sostenibel. E campaña di Pimp my Cup a dura un total di 4 siman.

E meta di e promocion ‘Pimp my Cup’ tawata pa encurasha nos comunidad carnavalesco, specialmente esun cu a bai wak e paradanan, miho conoci como ‘sideliners’, pa uza cupnan reuzabel en bes di cupnan di plastic di un solo uzo. Prome cu parada di mucha na Oranjestad y San Nicolas, mas cu 450 beker reuzabel a wordo reparti entre e personanan cu a bin pa mira e paradanan aki. Por medio di Ban Serio! su ‘promo team’ a invita e publico pa asina subi riba e bicicleta special unda por a decora e beker duradero den un forma creativo y carnavalesco.

Asina Ban Serio! ta uni su mes na diferente movecionnan cu a bin ta tuma luga na Aruba recientemente den cuadro di e introducion di ley pa cu e prohibicion di diferente plastic di un solo uzo como tambe prohibicion di sunscreen cu ta contene oxybenzone. Ademas, bou e lema di ‘LETS TALK TRASH’ A.T.A. lo sigui duna su granito na tur esfuerso haci y asina engrandece y salvaguardia nos medio ambiente pa medio di comunica y educa e pueblo di Aruba.

E promocion riba Facebook di Ban Serio! a ricibi mas cu 35 inscripcion unda cu mas di 400 persona a ‘share’ y asina yegando na miles di Facebook friends local cu a laga nan comentario positivo riba e postnan di e participantenan haciendo esaki un competencia hopi interesante y atractivo. Sr. Juni Giel a bay cu e titulo ganador es decir Sr. Giel a ricibi mas likes pa cu su beker reuzabel. Sr. Giel a ricibi 450 likes y asina a bay cu un ice jug grandi yena cu diferente producto duradero cual e lo por uza durante henter e aña.

Oficina di Turismo conhuntamente cu Ban Serio! ta duna danki na tur esnan cu a participa y ta sigui encurasha comunidad di Aruba pa uza productonan duradero y asina contribui na un naturalesa limpi pa Aruba, paso un Aruba dushi pa biba ta un Aruba dushi pa bishita!

Sigui y like e pagina di Ban Serio! Aruba riba Facebook, y asina keda pendiente di e actividadnan cu lo tuma lugar den temporada di campamento.

Comments

comments