Nos a yega na e ultimo siman di Ban Move Camp 2018. Manera añanan anterior Instituto Biba Saludabel y Activo (IBiSA) conhunto cu Arubaanse Sport Unie (ASU) a ofrece un programa di vacacion na nos muchanan.
Ban Move Camp a wordo organisa den luna di juli y cada siman na un localidad diferente. E prome siman tabata na Sportcentrum San Nicolas (IBiSA SN) e di dos siman na Compleho Deportivo Frans Figaroa na Noord y actualmente Ban Move Camp ta na Centro Deportivo Betico Croes na Sta. Cruz.
E cantidad di mucha cu ta participa ta varia di 85- 120. Durante e Ban Move Camp nan ta participa na weganan deportivo y deporte : Karate, basketball, atletismo, schermen y tambe a siña e wega ping pong.
E muchanan a gosa di un demostracion di e team di K9 y presentacion di algun fundacion manera Fundacion Famia Planea.
Durante e tres siman IBiSA su instructornan, coordinador y boluntario hunto cu e team di ASU ta percura cu e muchanan ta haci diferente deporte. Tur dia e programa tin un ‘break’ pa e muchanan descansa un rato di e weganan y come nan pan y fruta bebe nan juice y awa na ora. Un siman yen di actividad esey ta planea tambe pa e ultimo siman di Ban Move Camp cu a cuminsa dia 23 di juli 2018. Nos a yega na e cantidad maximal y desafortunadamente no tin mas luga.
Ta gradici e Ministerio di Turismo, Salubridad Publico y Deporte y ASU y tur trahado y boluntario di IBiSA pa nan dedicacion pa percura cu e muchanan a gosa di Ban Move Camp 2018.
Nos ta gradici tur muchanan pa nan participacion. Sigui IBiSA su Facebook pagina IBiSA Aruba pa tips kico pa haci durante vakantie.