E temporada di vacacion escolar a inicia y un bes mas ASU den colaboracion cu IBISA ta organisa un campo di vacacion pa nos muchanan. Den e ultimo añanan e ‘Ban Move Camp’ a bira masha popular y mirando e participacion grandi a dicidi di ripiti e actividad aki cu ta conta cu e sosten di Ministerio di Deporte y Fundacion Lotto pa Deporte
Durante 3 siman largo, di 10 te cu 28 di Juli 2017, e acomodacionnan deportivo di Centro Deportivo Betico Croes na Sta. Cruz, Joe Laveist Sport Park na San Nicolas y Centro Deportivo Frans Figaroa na Noord lo entreten’e alrededor di 100 mucha pa localidad, e mayoria di scolnan basico. Cada dia e muchanan ta haya actividad di movecion manera futbol, volleyball, beach volleyball, coremento di bicicleta y diferente weganan cu tin di haber cu traha hunto, yuda otro, ect. Tur participante a ricibi un t-shirt mientras tur dia ta ofrece 1 sandwich, 1 juice y 1 fruta.
Mirando di e importancia pa tene nos muchanan ocupa cu actividadnan di movecion y sano, Lotto ta masha contento di por contribui grandemente na proyectonan importante pa nos muchanan.
Un danki sigur na Lotto, e Loteria di Aruba pa medio di Comision di Subsidio a subsidia e Ban Move Camp 2017
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.