Diahuebs, dia 25 di November nos mester hunto para keto un rato pa reflexiona riba e trato inhusto cu hopi hende muhe y mucha muhe ta haya rond mundo.
Un den tres muhe riba nivel mundial ta experencia violencia den diferente forma durante nan bida, esaki hopi biaha ta wordo ocasiona door di un persona kende nan ta stima, confia of te hasta un hende nan conoce. E violencia aki por escala te na cierto extremo unda e muhenan aki ta fayece door di e slanan cu nan a sufri of incluso nan lo pensa pa pone fin na nan bida pa no biba den e abuso aki mas.
Women’s Empower Network ta boga pa inspira y motiva hende muhe y mucha den nos comunidad pa asina di e forma aki yudanan logra na full potencial mentalmente, fisicamente y spiritualmente.
Como un network di hende muhe nos ta kere den e poder pa kere den otro y para hunto pa e causa pa yuda otro hende muhenan yega unda nan mester yega. Na momento nos para hunto como muhe y como ser humano y regala un man pa yuda nos ta crea un otro nivel di energia pa e persona cu mester di dje. Como muhenan, mama, amiganan, profesional, nos mester bisti e petchi di ta MUHE cu orguyo y mester semper haci lo maximo pa ta personanan ehemplar pa nos mucha muhenan. Esaki ta sa di haci impacto pa trece cambio den mentalidad di e generacion nobo, creando di e forma aki leadernan den e comunidad femenino cu ta yuda otro.
Hopi ta esnan aki na Aruba cu ta biba dia aden y dia afo den violencia domestico, violencia verbal, bullying bou hende muhe, abuso sexual cu no ta mira salida pasobra no ta facil. Amiga, e no ta imposibel tampoco, pasobra semper tin un luz na final di e tunnel y nos tey pa yuda.
Women’s Empower Network ta uni su mes na e causa y lucha contra violencia di hende muhe y mucha pa yuda crea conciencia di e consecuencianan cu violencia contra hende muhe y mucha muhe tin pa e futuro generacionnan. Ki consecuencia esaki tin pa nos economia y bienestar di famianan.
Aportando na e causa grandioso aki Women’s Empower Network a crea un armband den e colornan oranje y biña cu ta e colornan di concientisacion contra violencia di hende muher. Cu cada benta di un armband lo haci un donacion di afl. 5,- na Fundacion di Hende Muhe den Dificultad pa asina aki nan sigui yuda mas hende muhe y mucha muhe na Aruba.
Pa tur esnan interesa den cumpra armband por like nos riba Facebook.com/womenempowernetwork pa asina aki abo tambe contribui na e educacion y concientisacion contra Violencia di Hende Muhe y Mucha Muhe.