Serlimar S G ta inicia un proyecto nobo den colaboracion cu Fundacion Pa Nos Comunidad, cu e meta principal pa yuda esunnan den necesidad durante e temporada den fin di aña. E proyecto aki tambe tin e meta pa conscientisa e comunidad di Aruba cu no ta tur material mester wordo tira afo, pero cu hopi material por wordo re-uza door di otro persona. E meta di mas importante pa Serlimar S G cu e proyecto aki, ta pa reduci e cantidad di desperdicio innecesario manera paña, sapato, co’i hunga di mucha cu ta yega na landfill Parkietenbos. Pa e temporada aki di fin di aña nos tur hunto por duna un man pa yuda un ruman den necesidad.
Pa e proyecto “duna un man pa yuda un ruman” Serlimar S G conhuntamente cu Fundacion Pa Comunidad ta haci e peticion na e comunidad di Aruba pa no tira paña, sapato, co’i hunga of buki afo cu bo no ta uza mas y cu ta den bon estado. Nos ta pidi pa colecta esaki nan y tuma contacto cu Serlimar S G via Facebook Messenger of na telefon 5245080 of por yama FPNC na 5880002 pa asina conhuntamente nos yuda nos ruman nan y muchanan den necesidad.
Na Aruba nos conoce e problema grandi di esunnan di menos recurso y den necesidad, y pa e temporada aki di fin di aña nos tur como ciudadano por duna un man na un ruman cu tin’e un poco mas duro y ta den necesidad. Fundacion Pa Nos Comunidad ta e unico “voedselbank” oficial na Aruba cu ta traha cu mas di 40 otro instancianan pa mas di 8 aña. Fundacion Pa Nos Comunidad ta brinda ayudo na famia nan den necesidad registra cu alimentacion, guia social y donacion di paña y articulonan di cas. Di e bunita proyecto aki Fundacion Pa Nos Comunidad lo beneficia di e donacion di articulonan, pa por sigui yuda su clientenan. Den cooperacion cu Serlimar S G, Fundacion Pa Nos Comunidad lo por sigui aporta na e bienestar social di su clientenan.
Serlimar S G conhuntamente cu Fundacion Pa Nos Comunidad kier logra e meta pa yuda tur esunnan den necesidad specialmente pa e temporada bunita aki di fin di aña, pa asina tur hende den comunidad por pasa un dushi Pasco y Aña nobo cu nan famia. Por medio di e proyecto aki hunto por sigui motiva e comunidad Arubano den su totalidad pa duna bek y di e mesun manera aki fortalece e sentimento di yuda un otro ruman den necesidad.